Wind Creek Hospitality cu donacion na Luna Foundation

Tur entrada colecta di e ‘schaatsbaan’ ta wordo otorga

ORANJESTAD (AAN):  E famia grandi di Wind Creek Hospitality a bini hunto un biaha mas pa celebra e temporada di mas dushi na Renaissance Marketplace. E famoso ‘schaatsbaan’ tey atrobe y e aña aki ta wordo dedica na Luna Foundation. Wind Creek Hospitality ta kere fuertemente den trabaonan comunitario y den duna bek na nos comunidad.  

            E aña aki un biaha mas Renaissance Marketplace ta yamabo bon bini na locual a inicia como Winter Wonderland. Debi na e situacion mundial di Covid-19, a adapta e celebracion festivo di pasco un poco pero e famoso ‘schaatsbaan’ tey un biaha mas pa asina grandi y chikito disfruta di esaki pa un temporada limita.

            E luna di december ta uno di mas dushi yena cu ambiente navideño sin laga afor e musica y entretenimento. Tur aña Renaissance Marketplace ta crea e ‘schaatsbaan’ pa asina tin un actividad pa henter famia. Sigur un momento di alegria bao nos muchanan. E aña aki, despues di deliberacion na cua instancia lo dedica e entrada di e schaatsbaan, a bin den mente Luna Foundation. Cu unicamente Afl. 5, bo por disfruta di e ‘schaatsbaan’ y contribui na un bon causa. Tur entrada genera durante di e periodo di pasco na Renaissance Marketplace, lo wordo entrega completamente na Luna Foundation.

            Wind Creek Hospitality ta kere fuertemente den trabaonan comunitario como tambe den duna bek na e comunidad di Aruba. Luna Foundation ta un organisacion cu ta wordo maneha pa un grupo di boluntarionan inspira y ta draai unicamente riba donacion di nos comunidad pa por sigui eherece nan trabao y e lucha pa cu cachonan bandona riba nos isla.

            Pa motibo aki tambe Wind Creek Hospitality kier a uni nan mes na e bon causa, y ta otorga tur entrada di e schaatsbaan den un forma di donacion pa asina yuda Luna Foundation. E schaatsbaan ta habri tur dia di 6’or di atardi pa 10’or di anochi. E invitacion ta keda pa bin pasa un momento den famia na Renaissance Marketplace y asina aporta hunto na e bon causa aki.