Diasabra awor:
ORANJESTAD (AAN): Wilhelmina Kanker Fonds ta organisando un simposio unda cu specialistanan ta bay papia riba e tema di cancer. E simposio aki lo tuma lugar gratis diasabra 29 di October di 9 or pa 12 or di merdia na Wind Creek Theater, asina señora Lily Prins a duna di conoce.
E tema di e simposio lo ta: 'Prevencion y Terapia di cancer di pecho'. El a extende un invitacion na henter pueblo di Aruba ya cu akinan ta haya e oportunidad di asisti na e simposio aki caminda specialistanan ta bay papia y e specialista principal ta doctor Daryanani, ciruhano oncologo.
Tambe ta bay tin Dt. Ladenius di Departamento di Oncologia di Hospital. Banda di esaki lo tin un di e nursenan tambe di Oncologia, Yolanda Levestone, entre otro profesional.
Esaki ta un informacion cu "nos tur mester di dje. Nos tur ta grita, pero aki na Aruba nos tin e personanan bon califica y nos tin cu gradici Dios cu awendia nos por keda ariba nos pida baranca aki y haya nos tratamentonan", a expresa.
Wilhelmina Fonds ya pa añanan ta dunando transporte na pashentnan cu tin mester di dje di cual famianan no por hiba nan pa nan tratamento of bay cerca nan doctor. WKF ta hacie pero mester inscribi pa asina nan por duna bo e transporte cu ta gratis. Un pashent di cancer ta haya esaki gratis di Wilhelmina Fonds, a remarca.
Lily Prins a sigui bisa cu hopi biaha ta sinti algun sintoma straño pero no ta worry y ora di bay pa haci un test of cerca doctor y e malesa presenta ta sclama "dicon ami?, dicon mi famia?".
Pa hopi aña ta papiando di percura pa bay y haci e testnan cu mester haci na tempo. "Stima bo mes", a bisa.
Semper WKF ta papia riba prevencion, pero hopi biaha e ta wordo neglisha. Hopi hende ta haci net contrario di loke nan mester haci y ora cu nan confronta e malesa aki di cancer nan ta bisa "dicon ami?", "pakico ami". Pero semper WKF a pone enfasis riba dje pa corda cuida bo salud.
