E proyecto di ley di presupuesto di 2023 no ta cumpli cu e rekisito di un surplus di 1 porciento di e PIB.
ORANJESTAD (AAN): Apesar di e fuerte recuperacion di economia di Aruba den 2022 e presupuesto ta mustra tanto pa 2022 como pa 2023 un deficit di financiamento.
Un boletin emiti Diabierna atardi door di CAft, ta bisa cu tumando na consideracion e tarea inmenso di refinanciacion cu Aruba tin pendiente pa e proximo añanan y e interes creciente, ta di gran importancia pa Aruba realisa surplus for di 2023 pa por reduci e debe publico di 5,9 miljard Florin. Pa realisa esey, ademas di aumento den entrada, mester reduci e gastonan structuralmente tambe. Den tal caso reforma den cuido di salud, e sistema fiscal y seguridad social ta crucial y inevitabel.
Traha pa yega na finansa publico sostenibel: Aunke economia di Aruba ta recuperando fuertemente desde final di aña 2021 y, segun e ultimo proyeccionnan di Fondo Monetario Internacional (FMI), na 2022 e Producto Interno Bruto (PIB) lo supera e nivel di 2019, ta premira cu e deficit di financiacion di Pais Aruba lo monta na 113 miyon Florin na 2022.
Esaki ta ekivalente na 1,8 porciento di e PIB. Aruba ta enfrenta un gran reto pa reduci e debe publico y hib’e na un nivel sostenibel mas lihe posibel. Na final di juni 2022 e debe publico di Aruba tabata monta na 5,9 miljard Florin; mas di 90 porciento di e volumen di e economia. E debe publico cuantioso aki ta nifica cu casi 19 porciento di e presupuesto ta bay na pagamento di interes. Berdad ta cu e bista plurianual, manera presenta den e proyecto di ley di presupuesto di 2023, ta presenta surplus for di 2024, pero no a duna contenido na nan cu medida concreto.
Si no tuma na consideracion e sumanan aki, cu tin un obhetivo imperativo, Aruba lo cumpli cu e norma di un surplus di minimal 1 porciento di e PIB apenas na 2027. Den e caso ey e debe publico nominal lo sigui aumenta te na 2026. Teniendo na cuenta e interes creciente y e refinanciacionnan considerabel den e proximo añanan, Colegio di supervision financiero di Aruba (CAft) ta keda insisti riba e importancia di realisa un saldo financiero di minimal 1 porciento di e PIB for di 2023.
Conseho di Ministronan di Reino a dicidi di no duna gobierno di Aruba un instruccion pa 2022, pero si a duna claramente di compronde cu Aruba mester realisa un surplus di 1 porciento di e PIB na 2023. E proyecto di ley di presupuesto di 2023 no ta cumpli cu e rekisito ey. Aruba ainda lo mester haci esfuerso considerabel pa realisa e surplus presupuestario ey structuralmente den e proximo añanan.
CAft a duna varios recomendacion al respecto durante e aña cu a pasa y ta constata cu no a sigui nan suficientemente. Asina, por ehempel, a pesar di un reduccion incidental na 2022, e gastonan pa bien y servicio structuralmente ta sigui ta halto compara cu realisacion den e añanan prome cu pandemia. Te ainda no a splica suficientemente e necesidad di aumento di e gastonan. Tambe ta asina cu contribucionnan substancial ta bay anualmente na diferente entidad gubernamental, manera Servicio di limpieza di Aruba (Serlimar), Arubus N.V. y Post N.V. Ta keda permanentemente di importancia resolve e problematica structural denter di e entidadnan gubernamental ey y e riesgonan corelativo pa e presupuesto nacional.
Impuesto: Den liña cu e obhetivonan di e Pakete di medida (Landspakket) Aruba a anuncia fin di 2021 cu e lo introduci reforma fiscal dia 1e. di januari 2023, incluyendo introduccion di Impuesto riba Balor Agrega (IBA-BTW). Sin embargo, a pospone introduccion di IBA-BTW. Na luga di esey ta aumenta e tarifa di Impuesto riba Volumen di Benta (BBO) cu 1 porciento, locual lo intensifica e efectonan di evasion y e riesgo di incumplimento di e impuesto aki mas ainda. Ta di suma importancia pa Aruba introduci un sistema di impuesto indirecto solido y husto prome cu dia 1e. di januari 2024.
Cuido di salud y seguridad social: Economisacion den cuido di salud y seguridad social ta necesario pa garantisa cu e sistema social ta keda pagabel pa e generacionnan futuro. E instruccion pa economisa 60 miyon Florin anualmente den cuido di salud ta un prome paso den direccion di un sistema di cuido di salud financieramente sostenibel y e mester garantisa cu na termino cortico Pais Aruba no mester contribui pa elimina e deficitnan di Seguro Medico General (AZV).
Door di tardansa pa introduci e lista positivo di remedi y articulo di verband y door cu no a introduci contribucion propio e gastonan di cuido di salud ta keda halto y AZV ta premira un resultado negativo pa 2022 y 2023. Ta importante pa ehecuta e economisacion planea a corto plaso pa evita un deficit y cu esey un posibel aporte di Pais Aruba.
Dia 20 y 21 di october 2022 CAft a haci un bishita na Aruba y a hiba combersacion cu Gobernador, Ministro di Finansa y Cultura, Ministro di Transporte, Integridad, Naturalesa y Asunto di Adulto Mayor, Conseho di Ministronan y Parlamento. Ademas CAft a hiba combersacion tambe cu Directorado di Organo Ehecutivo di Seguro Medico General, Asociacion di Hotel y Turismo di Aruba (AHATA) y Serlimar.
