Wilfred Ras ta bira e prome arubiano cu a core 6 marathon grandi na mundo  

Den menos di dos ora el a finalisa marathon na Tokyo

ORANJESTAD (AAN):   Ora mester elogia un persona mester haci'e. Esaki ta un ocasion pa elogia e meneer aki. Ta trata di e conocido comerciante Wilfred Ras kende tambe un coredo basta conoci na Aruba y tur ora cu tin un marathon e ta cla pa participa.

            Awor, DIARIO a haya e tremendo noticia cu meneer Ras ta e prome arubiano cu a yega di participa den tur marathon cu ta existi rond mundo y cu ta dedica specialmente na e adultonan mayor.

            Comosifuera poco, Ras, net diadomingo ultimo, el a core den e marathon na Tokyo, Japon y a haya su medaya di Abbot World Marathon Majors unda a finalisa e careda aki exitosamente den menos di 2 ora.

            Mester menciona cu e marathonnan aki ta basta reconoci rond mundo y nan ta forma parti di e asina yama 'World Marathon Majors', pa adultonan mayor, esta 60 plussers. Por menciona nan: TCS New York City Marathon, Bank of America Chicago Marathon, Boston Marathon, Tokyo Marathon, TCS London Marathon y BMW Berlin Marathon.       

            Wilfred Ras su entusiasmo y animo pa e deporte aki ta impresionante y por constata cu edad no ta un obstaculo pa logra e metanan. DIARIO ta felicita Sr. Wilfred Ras cu e bunita record aki.          

            Potretnan: Facebook Page 297 Sports