Doño nobo di e certamen cu cambio y decisionnan creando conflicto
ORANJESTAD (AAN): Nubia scur ta pasando riba e compania JKN Global Group cu ta e compania cu sede na Thailandia, cu ta doño awor di Miss Universe Organization. Nan a manda diripiente un nota cu yen di regla nobo cu no a cay den bon tera cerca varios organizacion rond mundo. Pa colmo a hasta bin un nota acerca relaciona cu pago di e “fee” pa nan keda afilia na e organizacion, y a trece acerca cu lo bin cu un proceso di bidding tambe pa check si acaso tin otro organizacion interesa na cada pais pa por bira e ‘national director’ den futuro.
Consecuencia di esaki ta cu den cuestion di algun dia, ya caba diferente pais a djis dicidi na cera buki, y a informa cu nan ta kibrando tur lazo cu Miss Universe Organization.
Indonesia a retira: E prome cu a dicidi na kibra tur lazo cu Miss Universe Organization ta Puteri Indonesia, kendenan tabata responsable pa e certamen na e pais pa ultimo 30 aña.
Ghana a retira: E organizacion cu ta encarga pa organiza Miss Universe Ghana Organization a dicidi cu nan no ta bay acepta e cos di bidding aki, y cu posible aumento di fee. Nan a prefera di retira.
Seychelles a retira: E organizacion di Miss Universe Seychelles Organization a dicidi cu nan no por cu tur e cambionan aki, y a dicidi pa entrega nan retiro.
Mauritius a retira: E Director Nacional di Miss Maurice (Mauritius), esta Nevin Rupear a bandona su puesto tambe. El a bisa cu pa su pais, nan no kier participa den bidding. Pasobra ta inhusto pa un otro hende cu ta bid mucho mas placa, ta bay tuma over tur e trabao duro cu e team cu hopi tempo a haci e evento pa mas di 7 aña caba.
Belize a retira: Otro mas cu a haci esaki tabata Belize. Nan a manda carta pa Miss Universe Organization pa duna despedida, y informa cu e pais ya lo no forma parti mas den e certamen mundial aki.
Cambodia a retira: Den un declaracion oficial haci Diahuebs 2 di Maart 2023, e director Romyr Libo-on di Cambodia International Models (CIM) a bisa cu pa nan sorpresa, e aplicacion di franchise di Miss Universe Cambodia no a wordo organiza pa Miss Universe Organization. Pesey nan ta expresa nan gratitud pa tur partner, patrocinador, sostenedor,fanatico, y candidatanan cu a yuda nan den ultimo seis aña.
CIM di Cambodia lo sigui funciona y manda candidata pa otro certamen mundial.
Argentina a retira: E personahe conoci como ‘Creador de Miss”, esta Osmel Sousa a confirma cu el a retira como Director Nacional di Miss Universe Argentina. E tsar di beyeza, kende a yega di produci hopi Miss ganador di Venezuela durante su carera, como tambe entrena varios Miss di Filipinas, a bisa cu ya e no por mas y a dicidi na usa e momento aki pa hala atras.
Vietnam a retira: Mientras tanto, Saigon Universe Corporation (UniCorp) su CEO, Tran Viet Bao Hoang kende a baha di su puesto como Director Nacional, a indica cu e organizacion nobo di Miss Universe Vietnam JSC no por usa e nomber di su organizacion, y nan ta den un disputa legal cu Miss Universe Organization.
Cayman Islands a retira: Informacion nobo a mustra cu den fin di siman, Cayman Islands tambe a kibra lazo. Ministro di Turismo di Cayman Islands, esta Kenneth Bryan a bisa: “Cayman Islands su industria turistico ainda ta recuperando, y e Ministerio ta hopi enfoca pa atrae turista y trece e nivel di bishitantenan bek na e nivelnan prome cu pandemia.” Pues Cayman Islands ta mustra claramente di no ta interesa di bay di paga e extra fee cu ta bay wordo cobra awor.
Reglamento nobo ta wordo cuestiona: Pa colmo, awor den un recien anuncio, e CEO di JKN Global Group, esta e persona transgenero Anne Jukrajutatip (riba e potret) a remarca cu esnan cu sali 1er y 2ndo finalista di e certamen di Miss Universe, no mag di participa na ningun otro certamen di beyeza.
No a haya claridad si e ta referi cu e prohibicion aki ta durante e aña cu nan tin e corona, of mas despues den futuro tambe. Si acaso e kiermeen pa resto di nan bida, esaki lo bay destrui e soño di hopi futuro candidata cu lo kier sigur bira ganador den otro certamen tambe.
Awor cu tur e bada bada aki a start, Anne Jukrajutatip a core bisa cu hopi hende no a compronde nan mensahe, y awor e ta bisando cu algo lo a bay robez den traduccion di nan boletin. E ta yamando tur cos cu ta pasando djis como un ‘drama’.
