ORANJESTAD (AAN): Centro di Bario Noord, den colaboracion cu CEDE Aruba y Aruba Mindfulness Institute,
ta prepara pa un anochi special dedica na bienestar mental, creatividad, musica y conexion comunitario. E actividad, cu e lema “Djis Relax”, ta invita habitantenan di Noord y comunidad en general pa disfruta di un momento diferente, leu di e presionnan di bida diario.
E encuentro ta tuma luga dia 15 di october, di 6:00 pm te 8:30 pm, na Centro di Bario Noord. Entrada ta completamente gratis, y tur hende ta bonbini pa participa na e programa, cu ta combina varios actividadnan enfoca riba relahacion, expresion creativo y un estilo di bida saludabel.
Segun e organisadonan, e actividad ta nace for di e necesidad pa crea un espacio unda personanan por para un rato, respira, conecta cu otro y dedica atencion na nan bienestar mental. Den un sociedad unda e ritmo di bida por ta hopi lihe, momentonan di descanso y cuido propio ta bira cada bes mas importante.
Durante e anochi, participantenan por disfruta di diferente experiencia, incluyendo motivacion, arte pa relaha, alimentacion natural, musica bibo, ritmo y alegria. Tambe lo tin un momento creativo cu tips pa bienestar mental, dunando participantenan oportunidad pa discubri manera simpel y practico pa cuida nan mente y bienestar emocional.
Un parti importante di e programa ta e enfoke riba alimentacion natural. Comunidad lo por conoce y explora ideanan relaciona cu producto local y alimento natural, promoviendo un estilo di bida mas conciente y saludabel. E actividad tambe ta pone enfasis riba creatividad como un manera pa libera tension, expresa emocion y stimula bienestar. Musica en bibo lo ta encargo Naty V., un talento local cu su boz angelical.
Aruba Mindfulness Institute ta contribui cu e mensahe di cuido propio: “Cuido propio kiermen, balora e fuente di bida den bo.” E filosofia aki ta invita hende pa duna atencion na nan mes, reconociendo cu cuido di salud mental y emocional ta un parti esencial di un bida ekilibra.
Musica tambe lo tin un papel central durante e anochi. Con musica bibo, ritmo y alegria, e organisadonan kier crea un ambiente positivo y relaha, unda hende por disfruta, socializa y fortalece e sentido di comunidad. Local Food Mondi Replika ta forma parti di e experiencia, agregando un elemento local na e actividad.
Centro di Bario Noord ta spera pa mira un bon participacion di comunidad y ta enfatisa cu no tin costo pa asisti. E invitacion ta habri pa hende di diferente edad cu ta interesa den un anochi di relax, creatividad, musica, alimentacion natural y bienestar mental.
“Djis Relax” ta representa mas cu un actividad social: e ta un invitacion pa para un momento, hala rosea, crea, disfruta y recorda cu bienestar ta un aspecto fundamental di nos bida. Entrada ta gratis.
