ORANJESTAD (AAN): E siman aki Ministerio di Naturalesa a organiza un reunion na Centro di Bario Playa Pabao pa duna un update riba e maneho di desperdicio na Aruba.
Durante e reunion a elabora, entre otro, riba e accion Baki den Bario cu ta tumando luga tur diasabra for di 7'or te cu 11'or di mainta como parti di campaña nacional 'Limpi Limpi.’ Esnan presente a haya espacio pa haci pregunta na Minister Arends y duna sugerencia pa sigui mehora e actividad.
E maneho di desperdicio ta uno dinamico y ta enfoca riba e participacion di ciudadano pa aporta na e limpiesa di nos isla. E meta di Baki den Bario ta pa stimula un habito di separacion di desperdicio den nos comunidad y hisa e cantidad di materia colecta cu por worde recicla. Materia cu por worde procesa sea na Aruba of den exterior door di exporta nan. Durante e charla, a comparti datos di e accion di Baki den Bario y a actualiza tur presente encuanto e esfuersonan pa sanea e area di Dump Parkietenbos. Un suma di 6 miyon Florin a ser aloca pa converti esaki den un parke solar.
“Mi ta contento di por crea conscientisacion bou ciudadano cu tur loke nos ta crea riba tera, tin impacto pa nos lama,” segun Minister di Naturalesa, Sr. Ursell Arends. Un aspecto clave di e enfoke di Minister Arends ta enbolucra campañanan educativo pa informa e comunidad tocante e importancia di separacion di desperdicio, y e impacto positivo cu esaki por tin riba nos ambiente.
E siguiente accion di Baki den Bario lo tuma luga diasabra 25 di november 2023 na Centro di Bario Playa Pabao 7'or te cu 11'or di mainta.
