Algemene Rekenkamer Aruba a mustra pakico Mike por a haci y deshaci cu placa - *Na vispera di eleccion rapportnan ta un advertencia den historia di Parlamento - *Miembronan di Parlamento di AVP a entrega placa di Aruba sin mas na Mike
ORANJESTAD(AAN)—Na 2017 Aruba a bay eleccion sin tabata na haltura kico Gobierno Mike Eman tabata capaz di haci cu placa di Pueblo di Aruba.
Uno di e rapportnan mas devastador riba trabou di Gobierno y di e miembronan di Parlamento cu a sostene Gobierno, a logra mira luz ora Gobierno Mike Eman a bay cas y Benny Sevinger no tabata por a tene e rapport scondi.
E proyectonan PPS, cu ta un ehempel historico di abuso di placa di Pueblo den cual sin duda gobierno di Mike Eman, a wordo splica den dos rapport cu a skirbi historia tambe pa e hecho cu directamente e autoridad financiero mas halto di Aruba, a condena e trabou cu e miembronan di Parlamento cu a sostene Mike Eman entre 2009 y 2017, a haci.
Awe na vispera di un eleccion nobo, mester presenta na huicio di Pueblo di Aruba kico ta socede ora Parlamento no cumpli cu su trabou pero permiti un gobierno ciegamente haci y deshaci cu placa di Pueblo manera e kier.
Uno di e derechonan mas sagrado di Parlamento ta pa e vigila kico Gobierno ta haci cu placa.
Cada cent cu Gobierno gasta, mester wordo responsabilisa enfrente Parlamento di e pais.
Si Mike Eman por a hiba Aruba na desastre cu actuacion di Hulanda a preveni, ta pa motibo di e forma cu e miembronan di Parlamento di AVP a duna Mike rienda suelta pa e haci y deshaci manera e kier cu placa di Aruba.
Awe cu Aruba ta bolbe prepara pa bay eligi miembronan di Parlamento, mester para keto na e dos rapportnan cu ta marca historia.
Algemene Rekenkamer Aruba semper tin un actitud severo enfrente Parlamento y nunca ta sconde su voz di autoridad enfrente ningun Gobierno ora e ta bira tribunal di e forma cu ta atende cu placa di Pueblo.
Den e rapportnan di “Bo Aruba” y e rapport cu ta papia di e proyectonan di Watty Vos Boulevard y Green Corridor, e desastre cu e silencio y permiso di Miembronan di Parlamento di AVP a causa pa Aruba durante 2009 pa 2017, ta grita.
Awe pa casi cuarenta aña Pueblo na Aruba ta condena na paga por lo menos 80 Miyon anualmente manera Hulanda mes a confirma den su relatonan.
Awe cu e rapportnan aki den man, nos ta confronta candidatonan cu kier drenta Parlamento cu e peticion, pa cumpli cu e huramento enfrente Dios, cu nan cuida interes di Aruba y no ta entrega lider di nan partido e derecho di abusa di placa di Pueblo.
