Durante tayer na Curaçao
ORANJESTAD (AAN): E luna aki, lider den e tereno di conservacion maritimo di region Caribense a reuni na Curaçao pa un tayer intensivo riba solucionnan di financiamento sostenibel pa area proteha. E evento di 3 dia, organisa entre Blue Marine Foundation, Blue Nature Alliance y Dutch Caribbean Nature Alliance (DCNA), a uni managers di parkenan maritimo y profesionalnan di conservacion for di diez isla Caribense.
Representantenan di tur seis isla di Hulanda Caribense a tuma parti hunto cu delegadonan di St. Vincent y Grenadines, Barbados, Republica Dominicana y St. Kitts & Nevis. Durante e tayer tabatin sesion di colaboracion, presentacion di experto y planificacion strategico pa enfrenta e desafionan grandi di financiamento cu ta reta e esfuersonan di conservacion maritimo den e region.
Participantenan a haya informacion riba mecanismonan diverso di financiamento, basa riba casonan den region y global cu por sirbi como modelo pa e ecosistema maritimo unico cu ta e ecosistema di Caribe. A enfoca riba oportunidadnan y colaboracion, mostrando con cambio intensional por crea un efecto domino den esfuerzonan di conservacion.
“E evento aki tabata hopi motivador,” segun Clare Brook, CEO di Blue Marine. "Diez isla Caribense a bini hunto pa comparti nan desafionan y preocupacionnan, specialmente falta grandi di financiamento y capacidad pa e trabao vital di conservacion den e region. Nos a sali cu un surtido di solucionnan creativo y innovativo cu tin e potencial pa hinca financiamento significante pa proteccion maritimo den e region. Den nos esfuerso conhunto pa proteha 30% di e laman pa 2030, Laman Caribense ta bira e 'Laman di Speransa!'"
E iniciativa "30 pa 30" ta representa un compromiso global pa proteha minimalmente 30% di e laman mundial pa 2030. E meta ambicioso aki ta trata pa proteha biodiversidad maritimo, reforza resistencia di ecosistema contra cambio climatico y garantiza medio di bida sostenibel pa comunidadnan na costa. “Cambio significativo ta pasa ora cu nos tende, traha hunto y pone e hende cu conoce e medioambiente mihor na e centro. Na Blue Nature Alliance, nos ta kere cu financiamiento pa conservacion ta un factor esencial, cu mester suporta prioridadnan dirigi pa islanan y amplia solucionnan regional. E decisionnan cu nos ta tuma awor ta importa, pa e laman y pa tur comunidad cu ta depende di dje," Sarah Elsaid, Lider Regional, Blue Nature Alliance, a bisa.
"Dutch Caribbean Nature Alliance ta kere firmemente cu colaboracion regional ta e clave pa un financiamento sostenibel pa conservacion," segun Arno Verhoeven, director di DCNA. "E tayer aki a duna un bista crucial riba e diversidad di strategianan di conservacion cu ta ser implementa na e islanan Caribense. Door di alinea nos esfuersonan, nos a tuma un prome paso importante pa desaroya mecanismonan di financiamento mas fuerte. Nos ecosistema maritimo comparti ta exigi solucionnan comparti."
E tayer a tabata un oportunidad balioso pa paisnan participante di comparti nan experiencia, celebra e exitonan den conservacion y desaroya strategianan hunto pa vence desafionan comparti. Participantenan a sali cu plan concreto pa implementa mecanismonan di financiamento sostenibel adapta na nan ecosistema y contexto economico.
Tocante e organisadornan:
(*) Blue Marine Foundation ta un organizacion benefico di conservacion maritimo na Reino Uni cu a ser estableci na 2010 pa un parti di e ekipo tras di e documental galardona 'The End of the Line'. Blue Marine ta dedica na enfrenta sobrepesca, un di e problemanan ambiental mas grandi di mundo, y tin como mision restaura salud di lama door di proteha y restaura e medio ambiente maritimo. Su mision ta pa garantiza proteccion eficiente di minimo 30% di e laman pa 2030 y maneho sostenibel di henter laman.
(*) Blue Nature Alliance ta un iniciativa global ambicioso cu ta traha pa acelera e ritmo, escala y efectividad di proteccion di 5% di e lama mundial, of 18.000 km², pa 2027, dor di colaboracion y innovacion dirigi pa su partnernan.
(*) Dutch Caribbean Nature Alliance ta e netwerk regional di area proteha y organisacionnan di conservacion riba e islanan Hulanda Caribense: Aruba, Bonaire, Curaçao, Saba, St. Eustatius y St. Maarten.
