Welpnan di Scouting Aruba a explora nan crecemento personal durante “The Jungle Adventure”

ORANJESTAD (AAN) Diasabra ultimo, welpnan di diferente gruponan di Scouting Aruba a wordo invita pa participa na e tradicional Rimboejacht,

cu e aña aki a carga e tema “The Jungle Adventure.” 

E actividad a combina aventura, wega y educacion, basa riba e metodologia di Scouting unda cada mucha ta wordo stimula pa desaroya su mes den diferente areanan di crecemento, entre otro afectividad, creatividad, spiritualidad, caracter, sociabilidad y desaroyo corporal. 

Durante e Rimboejacht, e gruponan participante a prepara diferente post di wega inspira pa personahenan relaciona cu e mundo di The Jungle Book. Cada personahe a representa un area specifico di desaroyo. Asina por ehempel, Baloo a representa sociabilidad, Bagheera, desaroyo corporal, Rikki-Tikki-Tavi, afecto y Kotick, caracter. Otro postnan a enfoca riba creatividad y spiritualidad. 

Cada wega a wordo diseña cu un obhetivo educativo specifico, demostrando cu den Scouting, hunga no ta simplemente pa pasa bon rato: cada actividad ta brinda un oportunidad pa siña, practica habilidadnan nobo y crece como persona. 

Durante e dia, e welpnan a traha entre otro riba reconocemento di emocionnan y con pa reacciona den diferente situacion. Nan a siña kico por haci — y kico ta miho evita — ora nan ta confronta cu un situacion dificil. Tambe nan a practica pasenshi, trabou den ekipo y cooperacion, y a experiencia e impacto positivo cu anima y “cheer up” un compañero por tin. 

Otro weganan a enfoca riba consciencia ambiental, cu atencion special pa e importancia di tene nos lama limpi y recicla materialnan. Tambe a traha riba e habilidad pa pensa prome cu actua, comprendiendo cu cada decision tin consecuencia y cu nos actonan por afecta tanto nos mes como otro hende rond di nos. 

Tur e temanan aki a wordo presenta den forma di wega, desafio y colaboracion, pa asina e muchanan por siña den un ambiente activo, divertido y sigur. 

Na final di e dia, durante clausura, e welpnan a participa den un momento di reflexion, unda nan a comparti con nan a experiencia e actividad y kico nan a siña durante e aventura. 

Cu actividadnan manera Rimboejacht, Scouting Aruba ta continua brinda muchanan oportunidad pa crece den un forma integral, mientras nan ta descubri nan mes, siña con pa relaciona cu otro y desaroya habilidadnan cu nan por uza den bida diario.