ORANJESTAD (AAN): Autentico Aruba Culinary Festival ta hopi mas cu un festival culinario.
Ademas di celebra e sabornan autentico di Aruba, e iniciativa tambe ta enfoca riba inversion den e profesionalnan cu ta forma e industria culinario di e isla awe y cu lo guia su futuro.
Como parti di e compromiso aki, Autentico lo organiza un Industry Seminar dia 8 di october 2026, reuniendo chefnan, profesionalnan di hospitalidad y operadornan di restaurant pa un mainta di inspiracion, innovacion y intercambio di conocemento. E evento lo tuma luga na Embassy Suites Aruba.
E seminario lo ofrece perspectivanan valioso tocante sostenibilidad, excelencia den servicio, tendencia internacionalnan den gastronomia y e posicionamento di Aruba como un destinacion culinario. Participantenan lo haya e oportunidad pa tende di expertonan y lidernan reconoci den e industria culinario internacional. E programa lo inclui presentacionnan di expertonan reconoci internacionalmente, un panel discussion y un demonstracion culinario.
Entre e oradornan invita tin Sian Young, un educador y consultor den maneho di desperdicio y fundadora di Siel Environment Services, cu mas cu 20 aña di experiencia den sostenibilidad y politica ambiental.
Werner Loens, ex-director y Hoofd Inspector di Michelin Guide Benelux, cu 37 aña di experiencia den excelencia di gastronomia y hospitalidad. Ademas, lo hiba palabra Lindsey Peckham, un lider den hospitalidad y ex-directora di Guest Relations na Eleven Madison Park, specialisa den crea un cultura orienta riba servicio, desaroya ekiponan di halto rendimento y crea experiencianan excepcional pa bishitantenan. Finalmente, lo tin Virgilio Martínez, un chef Peruano reconoci pa representa y promove Peru, su biodiversidad y paisahenan, y tambe pa su vision di un sistema gastronomico nobo cu a marca un prome y un despues den ‘haute cuisine’.
Bo kier participa, corda registra gratis na e website aki:
Participacion na e Industry Seminar ta sin costo, pero registracion ta obligatorio pa motibo cu espacio ta limita. Esnan interesa ta wordo pidi pa registra cu anticipacion pa sigura nan luga.
