Wega amistoso internacional  S.V. Mercurius - Titanes F.C. cu score di 2-1

Awe tin e rematch riba veld di Mercurius

ORANJESTAD (AAN): Diaranson 14 di september wega number 32 di e aña aki tabata riba programa. Den un duelo special y hopi amistoso cu un toke internacional SV Mercurius a gana cu 2-1 di Titanes FC.

            Goleadornan di Mercurius tabata Alfredo y Goyo. Den bispo di aniversario di su 72 aña di existencia (15 september 1950), SV Mercurius tabata anfitrion den station Guillermo Prospero Trinidad di e prome di dos wega internacional contra Titanes FC. Titanes FC a wordo representa door di algun ex hungador di e seleccion Colombiano.

            E fanaticonan di ambos ekipo riba tribuna a wak cu e prome 20 minuut e teamnan tabata buscando oportunidad sin yega na un atento di gol. E prome oportunidad real a wordo crea door di number 9 di Titanes FC pero su tiro a sali mucho halto. Despues di e momento aki Mercurius a cuminsa hunga mihor y a tuma mas iniciativa. Un bon wega posicional y poniendo presion a resulta den algun oportunidad.

            Un gol di Camilo a wordo anula pa via un falta contra e keeper di Titanes FC den e area di 5 meter. Despues Goyo y Flaco a encontra e portero y e palo di gol ta stroba nan pa anota e prome gol di wega. E prome mitad a caba cu e score di 0-0.

            Den secundo mitad un biaha mas ambos team a haci uzo e e posibilidad cambia hungador continuamente. Despues di 15 minuut Mercurius a tuma bentaha di 1-0. Un ataca cu a cuminsa cerca e keeper di Mercurius a bay via varios hungador y finalmente a duna Alfredo e chens di anota un gol a base di un assist di Flaco.

            Titanes a purba di bolbe tuma e initiativa, pero Mercurius a wanta bon.

Despues di mey ora den di 2 mitad, Mercurius a anota 2-0. E biaha aki un ataca bon planea cu assist di Harm a wordo corona door di Goyo. Titanes a wordo forsa pa hunga mas ofensivo. Esey a resulta den algun chens pa nan, pero tambe a duna mas espacio den nan defensa.

            Ocho minuut prome e ultimo signal di arbitro, Titanes a bolbe bek den e partido. Despues di un falta den area penal di parti di Mercurius, Titanes a ricibi un penalty. Portero Dennis a logra di para e tiro penal den prome instante, pero ela keda sin oportunidad den e rebound. 2-1.

            Despues di e gol di conexion, ambos team a ricibi algun oportunidad. Sin embargo, e publico presente mester a confirma su mes cu 3 gol. Pero husgando e reacionnan despues di e wega nan a keda satisfecho cu e wega.

            Awe Diasabra lo tin e rematch riba veld di Mercurius.