Weekend di Himno y Bandera lo tin fiesta cu famoso artista di soca Onyan

E grupo 3 Cylinder Band lo bin for di Antigua

ORANJESTAD (AAN): Durante un conferencia di prensa convoca na e fabuloso Neighba Restaurant na San Nicolas, a divulga algun evento na caminda cu sigur lo bay ta haci comunidad di Pariba di Brug, y pueblo general di Aruba hopi contento.

   E vocero Alex Geerman a indica cu nan ta preparando tres evento grandi den siguiente lunanan, pa asina sigui di ta solidario cu comunidad di Aruba cu gusta di ta activo cu actividadnan crea special pa nan.

   El a indica cu Neighba Restaurant ta treciendo algo grandi pa e weekend di Dia di Himno y Bandera na luna di Maart.  Esey ta encera un fiesta grandi den Centro di Bario Brazil durane e weekend largo di celebracion ey.

   Geerman a indica cu lo bay tin un banda musical procedente di Antigua, conoci como ‘Onyan & The 3 Cylinder Band’ cu ta hopi grandi den musica Soca.  Ta tur hende conoce e hit grandi “Ye Le Le” di Onyan.

   Nan hunto cu Mike’s Disco lo anima e anochi, hunto cu un Banda Sorpresa.

   Ticketnan ya caba ta na benta na e.o. Neighba Restaurant.  Segun Geerman a splica, e fondonan recauda pa Fundacion HCLF Aruba, esta Heart-Centered Leadership Foundation di San Nicolas, cu ta un organisacion sin fin di lucro cu ta dedica pa sirbi hobennan di Aruba y ta yuda sostene scolnan, organisacionnan cu ta yuda hobennan, y docentenan, y organisa proyectonan educativo pa hobennan.

   Nan lo comberti Centro di Bario Brazil den un berdadero cuna di Soca Music e anochi ey.