Lama bruto a benta varios ‘Pechi Portugues’ riba tera mey-mey yerba

ORANJESTAD (AAN): Dos siman pasa ora cu lama a bira bruto y azotando costa for di Zuidwest,

ta hopi yerba di lama a spula y keda pega atras riba beach.  No obstante cu tabatin Carnaval, DOW a percura pa bay haci limpieza y recoge tur yerba.

   E momento ey ta ora cu nan a bin descubri cu mey-mey di e yerbanan aki, tin algun di e jellyfish peligroso aki conoci como “E Pechi Portugues”.

   Pues na Papiamento e ta ‘E Pechi Portugues’.  Na idioma Ingles e ta ‘Portuguese Man of War’.  Na Hulandes e ta wordo yama ‘Portugees Oorlogsschip’.  Su nomber na Spaño ta ‘Carabela Portuguesa’.  E ta conoci pa su boei colorido cu tentaculonan largo y ta un especie di animal cu yama sifonoforo.

   Un sifonoforo (‘siphonophore’ na ingles of ‘siphonophoor’ na hulandes) ta parse un jellyfish pero en berdad ta organismo colonial. Esaki kiermen cu e ‘Pica Pica’, mane algun piscado sa yame, ta consisti di diferente animal cu hunto ta mantene e colonia bibo. Uno ta zorg pa e drif, uno ta percura pa su digestion, un ta percura pa gara presa y otro ta percura pa su reproduccion.

   Apesar di su apariencia bunita y unico, ta mihor pa admire for di un distancia. Su tentaculonan, cu por midi entre algun centimeter te cu 50 meter largo, ta ocasiona un picadura fatal pa su presanan y hopi doloroso pa e ser humano. Den casonan extremo, nan por resulta fatal pa hende tambe.

   E criaturanan aki ta worde impulsa door di biento y corientenan den lama, locual hopi biaha ta hibanan awanan caluroso, incluyendo esunnan di Aruba recien.

   Si bo mira e bunita Pechi Portugues aki, no mishi cune y aprecie for di un distancia!