WEB awor tin espacio yama ‘Hadrey di Franny’

ORANJESTAD (AAN): Recientemente sector di Water Distributie & Customer Service (WD&CS) a inaugura un espacio nobo pa nan departamento di mantencion.

   Pa sigui cu e tradicion di nombra espacionan na personanan significante, a sorpresa y duna honor na colega Efraim Rafael cu e nomber "Hadrey di Franny". Esaki a sosode den seno di coleganan, miembronan di famia di Efraim Rafael y invitadonan.

   Manager di e sector, Robert Croes a habri e bunita atardi aki y a sorprende Efraim Rafael cu e nomber di e espacio nobo aki na su honor. E nomber Hadrey masha poco ta wordo uza awendia. Hadrey ta parti di un cas caminda un grupo di famia of conocirnan tabata bini hunto pa reuni of simplemente pa combersa y pasa momentonan agradabel.

   A honra Efraim pa su curashi semper como chef di su departamento. Semper el a percura pa mantene su departamento uni. E ta un persona hopi keri pa su coleganan! Ta desea coleganan di departamento di mantencion di sector di WD&CS hopi exito cu Hadrey di Franny.