Glenn Rock di WEB Aruba NV:
ORANJESTAD (AAN): WEB Aruba ya pa 16 aña, hunto cu Quota International of Aruba, ta hibando e mensahe di conscientisacion di cuido di oido na muchanan di klas 6 di scolnan basico. Glenn Rock di WEB a haci e recorido na scolnan y a duna charla hopi interesante na nos muchanan enfatisando cu nan mester ta consciente di nan oido no solamente durante e temporada di Carnaval, sino na cas y tur caminda.
Señor Rock ta enfatisa cu ta importante pa haci test di oido cerca muchanan di kleuter te cu prome cu nan bay afo pa sigui studia, pa wak e desaroyo sin an oido a bay atras of no. Hopi mucha ta uza earbuds tur dia hasta ora nan ta haci huiswerk y tambe ta drumi, pega soño cu nan den nan orea. Di e manera aki, señor Rock a splica, cu e decibel ta traha den oido constantemente. Pa ora e muchanan bay studia afo, nan oido ta bay atras. Segun señor Rock, esaki ta resultado di un investigacion riba muchanan cu ta bay Universidad, na unda hopi di e hobennan cu ta sinta ful patras den e sala, no ta scucha bon.
“Ta pa e motibo aki, ta bon pa conscientisa nos muchanan, no durante Carnaval so, pero constantemente recorda nan cu e earbuds ta malo pa nan oido”, señor Rock a enfatisa.
E mensahe di conscientisacion ta pa uza earplugs no solamente den temporada di Carnaval, temporada di klapchi y di tur otro ocacion na unda tin zonido fuerte, hunto cu e uzo di earbuds cu ta expone nan oido na decibel halto cu ta afecta nan oido eventualmente.
Tur esaki, señor Rock a splica muchanan di klas 6 sperando tambe cu e muchanan hiba e mensahe cas y cu nan mes tambe ta mas consciente di zonido fuerte, uzo di earplugs y di e daño cu earbuds por haci na nan oido. Hende su oido ta importante y ta keda na cada ciudadano pa ta consciente di esaki y mas importante, pa cuida oido di nos muchanan.
