Evita boet y takelmento door di cumpli cu regla y pago pa parkeo

Aruparking lo intensiva control riba parkeo

• Awor bo tin di marca bo nummerplaat ora di paga na mashin 

ORANJESTAD (AAN): No ta un secreto cu den centro di ciudad tin un free for all tumando luga cu parkeo y esaki no por tolera mas. Di acuerdo cu ley, automobilistanan cu ta haci uzo di un luga di parkeo den zonanan cu mester paga pa parkeer, mester cumpli cu esaki di forma resonsabel. Mientras cu Gobierno ta studiando e construccion di parkeergarages pa aumenta y facilita e cantidad di espacio pa parkeo, controlnan riba parkeo a cuminsa tuma luga.

   Desde October 2025 Aruparking y KPA a cuminsa enfoca nan control riba autonan cu ta para unda nan no mag para. Por ehempel, autonan cu ta para di tal forma cu nan ta stroba brandweer, ambulance y bus di por pasa. Lamentablemente e controlnan a resulta den mas cu 375 procesverbaal y mester a takel mas cu 150 vehiculo.

    Awo Aruparking ta intensiva su controlnan riba pagamento pa parkeer. Mientras e ley vigente pa parkeo tin su limitacionnan, e ta duna Aruparking e autoridad pa takel vehiculonan cu ta ocupa un luga di parkeo sin paga. E controlnan aki lo inicia den e dianan nos dilanti, y entrante februari lo ta mas intensivo.

    Evita di haya boet y cu Aruparking lo takel bo auto, door di cumpli cu pago pa parkeo den Centro di Oranjestad. E prijs pa parkeo ta 1 Florin pa 30 minuut, y 2 Florin pa ora. Por paga via Pay.aw, cu debit/credit card of cu cash (moneda). Esnan cu ta biba of traha den e zona di Aruparking por abona pa 75 Florin pa luna. Tambe tin tarifanan social pa abona.

    Esnan cu opta pa no paga, por staciona nan auto gratis den e parking lot patras di ex-DOW/banda di Arubus.

    Tuma nota cu e proceso di pago a cambia y no mester yena un parkeervak mas ora di paga. Awo por yena solamente e number di bo auto, y por parkeer den cualkier zona di Aruparking pa e duracion pa cual a paga. Esnan cu ta uza Pay.aw por prolonga nan parkeo via e app. Esnan cu ta paga cu debit/credit card of moneda por prolonga nan parkeo via cualkier punto di pago di Aruparking.

   Gobierno y Aruparking ta haci un suplica na tur cu ta parkeer den Centro di Oranjestad pa evita boet y cu mester takel bo auto, door di cumpli cu regla y paga pa parkeo. Den caso cu Aruparking takel bo auto, e chauffeur y doño ta responsabel pa e gastonan di esaki. Mientrastanto, e proceso pa cambia e ley di Aruparking pa por haci controlnan mas eficiente y efectivo, a inicia.