WEB Aruba NV tin 15 aña consecutivo ta sponsor earplugs pa nos muchanan durante carnaval

Ademas di duna lecturanan pa concientisa cuido di oido:

ORANJESTAD (AAN) – Señor Glen Rock, funcionario di WEB Aruba NV, den entrevista cu DIARIO a trece dilanti, cu e tin 15 aña dunando lectura na alumnonan di scol basico, prome 5de y 6de klas, y awo mas tanto 6de klas.

Esaki pa concientiza nan riba proteccion di nan oido, no solamente den temporada di carnaval pero durante henter e aña, pasobra nan ta usa dispositivonan dañino pa nan oido.

E ta enfoca tambe riba decibel. Con e sonido halto ta afecta e celnan di nan oidonan, y trece dilanti pa cu carnaval cu WEB tambe ta sponsor e earplugs pa mucha, cu nan ta haciendo pa 15 aña consecutivo, locual ta algo noble pa nos muchanan.

Señor Rock a comenta cu ta masha importante pa haci un onderzoek riba e oido di muchanan for di Kleuterschool, pa ora nan bira grandi, prome cu nan bay Hulanda of otro pais pa studia, pa haya sa con nan oido a wordo afecta durante e tempo cu nan a biba na Aruba. E cifranan ey ta hopi importante pa dispone di dje.

Mirando cu esnan cu ta toca den carnaval no ta cumpli cu un regla pa tene nan mes na un volumen di sonido razonable, señor Rock a menciona cu tin un ley riba mesa aworaki cu mester reinforza. Awo ta importante pa splica cu tin un ley y den futuro probablemente lo tin un boet, pasobra di otro manera no por. El a splica cu e musiconan ta zorg pa e sonido pero esun cu ta scucha por hala mas leu di e sonido, of usa earplug, y concientiza su mes cu e ta keda cu e daño den su audicion.