Tocante e caso di e hoben cu a perde su bida den fin di siman:
*Asina so por contesta tur e preguntanan cu tin!
ORANJESTAD (AAN) — Minister di Husticia, señor Rocco Tjon, a referi tambe, den conferencia di prensa, na e caso grave cu a sosode den e fin di siman cu a pasa, cual e ta menciona: “a causa hopi rabia den nos comunidad, hopi emocion, el a conmove pueblo, y nos tin comprension p’esaki”. Minister Tjon a comenta, cu ya caba tin diferente declaracion cu a wordo duna door di Ministerio Publico, door di Alto Mando di KPA, door di su persona mes, pero nan ta haya bon pa e dia aki, conhuntamente, duna e declaracion aki, pero na mesun momento contesta tur pregunta cu por tin, e gobernante a reitera.
“Pasobra cada organizacion tin un rol diferente den locual a sosode. Pero e ta pa evita mal interpretacion y pa contesta tur pregunta cu por tin, pa di e forma aki brinda e transparencia cu, nos ta compronde, tin anhelo na dje”, Minister Rocco Tjon a enfatiza.
E minister a agrega cu e no por keda sin, cada bez, expresa palabranan di forza na e famianan di e hoben cu a perde su bida, y mirando e conmocion cu e caso aki a crea den nos comunidad, e ta haya cu ta importante pa tin un investigacion riguroso tuma lugar, pa cu esaki.
Solamente a traves di un investigacion riguroso e contestanan por wordo brinda na tur hende. “Manera ta conoci e investigacion aki a cuminza mesora, e ta wordo haci door di Landsrecherche cu ta resorta directamente bao di nos Procurador General”, Minister Tjon a indica.
Minister di Husticia kier a haci un yamada na e medionan di comunicacion, pa brinda husticia e espacio pa e investigacion tuma lugar, pasobra na final di dia, e unico manera cu nos por brinda e contestanan na tur e preguntanan cu por tin for di comunidad, prensa mes, cu minister y demas autoridad tambe tin pasobra ningun di nan tabata presente, ta si por garantiza c’un investigacion riguroso y detaya, lo por tuma lugar pa wak si por duna contesta na e preguntanan cu tin.
“Na su debido tempo, e hayazgonan di esaki kizas lo wordo presenta dilanti un huez, y na tur esnan cu tin pregunta pa e dia ey tin claridad y contesta na tur e preguntanan cu tin”, Minister di Husticia a reitera.
El a declara cu e por garantiza cu e investigacion aki ta on going, pero na mesun momento cu e lo ta uno hopi detaya pa di e forma ey tur cos cu por a sosode, sali na cla tambe.
