Net e boto tabata pasando cerca di Aruba
ORANJESTAD (AAN): Tabata Dialuna mainta, cu Centro MOC (Centro Operacional Maritimo) di Wardacosta a capta un mensahe di emergencia via di Marineradio canal VHF 16. Ta trata di un boto tipo charter cu 5 persona abordo pidiendo asistencia riba lama. E boto tabata nabegando den awa nan di Aruba y di un momento pa otro awa a cuminsa drenta den e boto. Inmediatamente a pidi asistencia di e helicopter di Wardacosta pa asina monitor e situacion y simultaneamente dos unidad di Metal Shark a sali for di Savaneta pa yuda.
Diferente boto di piscado den e area tambe a tuma nota di e mensahe riba canal 16 y nan tambe a bay den direccion di e boto pa asina por yuda debidamente.
Hunto cu e unidad nan di Metal Shark y diferente boto den becindario, a logra di compaña e boto pa asina e por yega 'safe and sound' ta na pier di Renaissance Marina.
Un danki ta bay na tur boto cu a asisti durante di e mision di rescate aki. Esaki ta demostra con hunto cu comunidad riba lama nos por zorg pa siguridad maritimo. Hunto nos ta fuerte.
