Exitoso mainta di 2 edicion di Feria di Salud na San Nicolas

Organiza pa Aruba Lions Club

ORANJESTAD (AAN): Diasabra mainta tabatin un exitoso Feria di Salud na San Nicolas.  Organiza pa Aruba Lions Club, cual Club otro aña lo celebra su di 80 aña di su existencia, y pesey ta

bisa danki y ta gradici pueblo di San Nicolas y vecindario pa a acudi for di mainta trempan caba

na e Feria di Salud na Colegio San Augustin y a haci e evenemento un exito rotundo.

   Un danki special ta bay na nos colaboradornan kende nan ta: Colegio San Augustin pa facilita e

lugar, Xavier University cu nan equipo Medico, Nursenan cu a controla, sucu, cholesterol, presion etc., Aruba Vision Center cu a controla e presion den wowo cu ta algo sumamente importante pa tene cuenta cu ne, Fundacion Smile Moble cu a controla, haci limpieza y reparacion na dentadura nan falso.

   Tambe na Fundacion ABO cu tabata presente pa promer biaha y cu a duna informacion y guia importante pa tene cuenta cu nos tripanan, Mary Joan Foundation cu nan equipo di 3 Doctor cu tabata presente pa haci e examinacion di pechonan pa tanto hende homber y hende muhe pa preveni cancer di pecho, FEPOH y QUOTA cu a guia y haci e testnan pa oido, na Dr. G. Fun-A-Fat cu tabata duna informacion over di uzo di remedi nan corectamente, con y kico haci ora mester tuma mas cu un of dos pilder pa un tratamento, LEO CLUB y tur nos Leonnan pa nan ayudo y sosten personal y moral pa cu e exito di nos di 2 edicion di Health Fair, San Nicolas.

   Mester menciona cu tur instancia cu a colabora a haci esaki gratuitamente y pesey mes tur bishitante a haya tur servicio gratis. Tambe un danki pa esnan cu a yuda tras di cortina kendenan a set-up e lugar, a prepara tur cos di come y di bebe pa tur cu a acudi na e Feria di Salud. Aruba Lions Club ta sumamente contento y satisfecho cu por a atende mas di 130 persona durante e mainta di e Feria di Salud aki.

   Tambe un gradicimento special na tur prensa skirbi, radial y televisa cu a contribui na e exito di e mainta aki y Aruba Lions Club ta conta ariba nan sosten y cooperacion pa e proximo actividadnan. Por ultimo Aruba Lions Club ta pidi e pueblo en general y en particular esun di Oranjestad y vecindario pa keda pendiente pa e siguiente Health Fair cu lo bay ta 13 di juni proximo. Mas detayes lo sigui despues.