Lider di fraccion AVP, Jennifer Arends-Reyes:
ORANJESTAD (AAN): Lider di Fraccion AVP y parlamentario Jennifer Arends-Reyes a expresa su apoyo pa e intencion di adapta e Landsverordening Normering Topinkomens (LNT), describiendo e iniciativa como un paso importante den direccion di un mercado laboral mas competitivo y un gobierno cu por retene e miho talento local na Aruba.
Segun Arends-Reyes, Aruba ta enfrenta un reto creciente relaciona cu fuga di talento, unda hopi profesional altamente capacita ta busca oportunidad den exterior debi na condicionnan laboral y perspectivanan di crecemento cu frecuentemente ta mas atractivo cu loke Aruba por ofrece actualmente.
“Nos no por papia di desaroyo economico y fortalecemento institucional si nos mes profesionalnan no ta haya oportunidad pa progresa y desaroya nan carera aki mes na Aruba,” Arends-Reyes a declara. “Si nos kier construi un pais fuerte y competitivo, nos mester crea circunstancianan caminda talento local kier keda y aporta na e futuro di nos comunidad.”
E parlamentario a indica cu un revision responsabel y realistico di e normanan salarial por contribui na retene experto den areanan strategico manera salud, enseñansa, finanzas, tecnologia y administracion publico. Segun Arends-Reyes, e realidad actual ta mustra cu Aruba ta competi pa talento no solamente cu paisnan den region, sino tambe cu mercado internacional cu regularmente ta ofrece condicionnan mas atractivo pa profesionalnan altamente cualifica.
Arends-Reyes a enfatisa cu e proposito di e adaptacion no ta pa promove salarionan exorbitante ni uzo iresponsabel di recurso publico, sino pa establece un marco legal cu ta refleha e realidad economico actual y cu ta permiti institucionnan publico funciona cu e liderazgo y conocemento necesario pa enfrenta e desafionan di futuro.
“Un sistema salarial moderno y ekilibra ta parti di bon gobernacion. Ora nos inverti den nos propio hende, nos ta inverti den calidad di servicio publico, den continuidad institucional y den capacidad di nos pais pa crece y progresa,” el a expresa.
E lider di fraccion AVP a señala cu na Hulanda e ekivalente di e ley, e Wet Normering Topinkomens (WNT), ta revisa y actualisa anualmente tumando na cuenta desaroyonan economico y costo laboral. Pa 2026, e maximo general na Hulanda a subi te €262.000 pa aña, precisamente pa mantene competitividad den sector publico.
Den contraste, e maximo salarial contempla den e LNT di Aruba a keda fija na Afl. 329.000 pa aña desde juni 2022 y ta vincula na un periodo di transicion di cinco aña. Segun Arends-Reyes, e experiencia di e ultimo añanan tambe a mustra situacionnan caminda profesionalnan treci di exterior por haya contratonan cu no necesariamente ta cay bou di e disposicionnan actual di e ley, mientras profesionalnan local frecuentemente ta confronta limitacionnan diferente.
“Nos mester evalua si e sistema actual ta logra e resultado cu originalmente a busca. Aruba no por permiti cu su propio talento keda den desbentaha ni cu institucionnan perde capacidad pa atrae y retene e persona adecua pa posicionnan clave,” Arends-Reyes a señala.
E parlamentario a indica cu lo sigui monitor di cerca e proceso di elaboracion y implementacion di cualkier adaptacion na e ley, enfatizando cu transparencia, responsabilidad fiscal y interes publico mester permanece elemento central den tur decision.
“Nos prioridad semper lo ta un gobierno eficiente, transparente y responsabel cu ta maneha placa publico cu cuidou. Na mesun tempo, nos mester crea e espacio necesario pa profesionalnan local por keda, crece y sigui aporta na desaroyo di Aruba. Esey ta un inversion den nos pueblo y den nos futuro,” Arends-Reyes a conclui.
