Wardacosta di Caribe Hulandes ta celebrando nan di 30 aniversario

ORANJESTAD (AAN): Bayendo bek den historia, tabata riba un Diahuebs dia 1 Februari 1996 cu a pone fundeshi pa loke awe tur hende conoce como Wardacosta di Caribe Hulandes.

Wardacosta ta un partner importante den seguridad maritimo y ta un organizacion profesional y respeta local y internacional.

   Loke a cuminsa como un partnership simpel entre polis di haven, milicia y Defensa Antiyano, cu un oficina den algun cabina portatil y un barak sirbiendo como e Centro di Rescate y Coordinacion (RCC), a crece den trinta aña bira un organizacion madura cu ta vigila e costanan maritimo 24 ora pa dia, 7 dia pa siman.

   Den e prome añanan, e forsa laboral tabata consisti di mas o menos 80% personal di defensa y 20% personal local. Esaki awor a cambia completamente. Awendia, mas o menos 80% di e personal di Wardacosta ta local. E desaroyo aki ta enfatisa e raiznan local fuerte y e crecemento di e organizacion.

   Wardacosta a pasa pa un desaroyo rapido for di cuminsamento. E prome Cutternan a wordo poni den uso na 1999, cuminsando cu Jaguar na Curaçao, sigui pa Panter na Aruba y Poema na St. Maarten.  Ademas di botonan di patruya y botonan di costa, e flota a modernisa durante añanan cu e introduccion di Super RHIBs y mas despues Metal Shark. Tambe a desaroya capacidad aereo, cu e avionnan di Wardacosta y helicopternan, cualnan ta ser sostene pa e punto di sosten di Hato y un sistema di

radar extenso.

   Formacion y profesionalismo semper a bira balornan central den Wardacosta. For di e prome estudio cual ta e ‘Initiële Kustwacht Opleiding’ (IKO) na 1998, cu a sigui desaroya bira e ‘Junior Bemanningslid Kustwacht’ (JBK) na 2024, cu a percura pa e hoben ricibi un diploma SBO-2.

   Cu e transicion pa un organizacion totalmente basa riba informacion 24/7, planea pa e cuminsamento di 2026, y cu un crecemento pa aproximadamente 320 posicion di formacion, Wardacosta ta mira e futuro cu confianza. E celebracion di su 30 aniversario no solamente ta un momento pa mira bek, pero riba tur cos ta un paso fuerte pa dilanti.

   E 30 aniversario di Wardacosta a wordo celebra conhuntamente cu receptie di aniversario na Curaçao, Aruba y St. Maarten. E celebracion aki a simboliza e cooperacion estrecho entre e tres paisnan cual desde nan establecimento na 1996 tin un colaboracion cu a forma Wardacosta den un partner fuerte di seguridad den Caribe.