Sterilizacion gratis ta sigui den 2026
ORANJESTAD (AAN): Stimami Sterilisami a logra un otro aña di gran impacto den su dedicacion permanente pa alivia sufrimento di animalnan na Aruba mediante sterilisacion di cacho y pushi. Durante 2025, e fundacion a logra financia e sterilisacion di 6,405 cacho y pushi, un logro remarcabel cu ta trece e total di sterilisacion desde 2016 te na 46,352.
E resultado di 2025 a bira posibel danki na un esfuerso colectivo, cu ta distribui den lo siguiente:
(*) Caduary Veterinary Clinic, den colaboracion cu Luna Foundation: 2,424 sterilisacion.
(*) Animal Welfare Alliance Aruba (AWAA), enfoca riba famianan cu entrada abou: 1,652 sterilisacion.
(*) Veterinary Specialty Hospital (animalnan sterilisa via fundacionnan di rescate): 1,322 sterilisacion.
(*) Veterinary Specialty Hospital (animalnan sterilisa door di doño individual): 859 sterilisacion.
Esaki no ta simplemente cifranan; ta bida cu a cambia, sufrimento cu a wordo preveni, y un futuro mas saludabel y mas sigur pa animalnan, nos comunidad y salud publico pa e comunidad Arubano den su totalidad.
Fundashon Stimami Sterilisami su mas sincero gradicimento ta bay na tur sostenedo y boluntario cu ta sostene nos mision, incluyendo Bucuti & Tara Beach Resort, Tourism Product Enhancement Fund (TPEF), Aruba Tourism Authority (ATA), One Love Foundation Inc., Setar N.V., Aruba Hotel & Tourism Association (AHATA), y tur otro organizacion y sostenedo priva cu a brinda nos sosten durante 2025 y añanan anterior. Bo fe den prevencion, solidaridad, y responsabilidad ta fundamental pa e trabao di gran balor cu nos ta realisa.
Nan ta profundamente agradecido na nos aliadonan clave cu a contribui na e resultado positivo aki, incluyendo nos clinicanan veterinario dedica: VSH Veterinary Specialty Hospital y Caduary Veterinary Clinic, cu su colaboracion cu Luna Foundation a resulta esencial. Nan tambe ta gradecido pa e partnership cu Animal Welfare Alliance Aruba (AWAA), un clinica cu ta ofrece sterilisacion sin costo pa cacho y pushi di famianan cu entrada limita. Den aña 2025, AWAA a completa 4,687 sterilisacion, cual 1,322 a wordo subsidia door di Stimami Sterilisami.
Nan ta extende nan gratitud na e organisacionnan di rescate cu a traha incansablemente pa yega cu e animalnan na e clinicanan, asina como na comunidad Arubano y doñonan di mascota cu a hasi e escogencia responsabel pa sterilisa nan mascotanan—protegiendo nan salud y asina preveni crea no desea.
Nan tambe ta orguyoso pa colabora y duna sosten na Snoop Doggy Foundation, cu su buki educativo riba cuido responsabel di mascota y ta inspira e generacion di mañan pa trata animalnan cu amor, responsabilidad y respet.
Un programa humanitario y comproba cu Aruba no por perde!
E impacto di sterilisacion ta acumulativo y e riesgo di sobrepoblacion por crece rapidamente si e trabao wordo suspende. Den Aruba su clima cu crea ta tuma luga tur aña, un solo animal no sterilisa por trece un expansion rapido di poblacion. Por ehempel, un pushi muhe no sterilisa por hunto cu su descendiente, produci mas cu 11 miyon pushi den solamente seis aña. Un cacho macho sin sterilisa por resulta den mas cu 67,000 descendiente den e mes un periodo. E cifranan aki ta demostra claramente con sobrepoblacion por sali fo'i control sin intervencion na tempo y na scala suficiente.
Sin un esfuerso continuo di sterilisacion, miles di cacho y pushinan nobo lo nace tur aña, creando presion riba asilonan y fundacionnan di rescate, aumentando sufrimento di animalnan, y tin un impacto negativo riba nos comunidad y nos economia cu ta basa riba turismo. Aunke ley mas fuerte, mas aplicacion di regla y doñonan mas responsable ta necesario, e origen principal di e problema ta falta di prevencion.
Sterilisacion ta keda e solucion mas eficiente, humano y sostenibel den nos poder pa reduci sufrimento, proteha salud publico, nos medio ambiente y bienestar di nos comunidad. Sterilisacion ta sigui gratis y accesibel durante 2026.
Na 2026, Stimami Sterilisami ta orguyoso pa confirma cu e proceduranan di sterilisacion den su programa nacional lo keda 100% gratis, garantisando cu e servicio keda accesibel den cada area di nos isla.
Manera semper, e subsidionan disponibel na nos veterinario participante (VSH Veterinary Specialty Hospital y Caduary Veterinary Clinic) ta inclui antibiotica, medicina contra inflamacion, anestesia y un microchip gratis cu instalacion profesional. Pa registra bo mascota pa e subsidio, por bishita stimamisterilisami.com y sigui e paso di registracion.
Cu bo sosten nos ta continua nos compromiso pa traha di 2026 un otro aña sobresaliente den nos esfuerso pa promove bienestar di animalnan na Aruba. Hunto nos por logra mas.
