Wardacosta a rescata 21 mucha riba boto di bela pega banda di Saba

PHILIPSBURG: Wardacosta di Caribe Hulandes, a confirma cu Diamars marduga cu a pasa, via di Maritime Operation Center (MOC),

nan a ricibi yamada di auxilio di un Boto di Bela cu mester di yudanza urgente, despues cu el a pega riba pida seco banda pabao di e isla di Saba.

   Mientras tanto un otro Boto di Bela cu tabata den cercania, tambe a core yega y a duna asistencia, door di tuma over tur e hendenan cu tabata abordo di esun cu a keda pega.  Esey ta pa haci e boto mas liviano, pa check si asina e lo por los di e area unda el a keda pega.

   Ora cu un boto tipo Metal Shark di Wardacosta a yega eynan, nan a asisti den transporte di un total di 23 persona, incluyendo 21 mucha, pa e Waf di Saba.

   Nan tur a yega sano y salvo na waf di Saba, y ningun hende a resulta herida.