Wardacosta a bay yuda 2 turista cu a drief yega te riba rifnan

ORANJESTAD (AAN): Siman pasa, e Centro di Operacion Maritimo (MOC) di Wardacosta di Caribe Hulandes,

a ricibi yamada di un ciudadano na Aruba.  El a informa cu el a mira con dos turista ta drief riba salbabida tipo floatie di aire, y nan a keda wordo lastra poco-poco door di lama, y a bay basta leu for di costa na Mangel Halto.

   E turistanan a keda flota te ora cu nan a yega na e Rifnan cu tin pazuid di Mangel Halto, y por a mira nan riba e islanan ey y claro nan no tin poder pa regresa canto bek cu nan propio forsa.

   Mesora MOC a manda un boto di accion rapido, esta Metal Shark di Wardacosta na Savaneta pa bay rumbo pa Mangel Halto pa asisti e turistanan aki.

   Ora di yega eynan, e oficialnan di Wardacosta a hisa e dos personanan abordo, y a hiba nan bek na forma safe bek na costa di Mangel Halto Beach.

   E dianan aki, tanto coriente di lama como tambe biento ta fuerte.  Spera cu mas hende tuma bon nota di esey.