Aruba Tourism Authority a reconoce tres persona excepcional den mundo di turismo

ORANJESTAD (AAN): Durante conferencia di World Tourism Day, Aruba Tourism Authority (A.T.A.) a reconoce tres persona excepcional cu ta contribui grandemente na e industria di turismo di Aruba.

Como parti di e celebracion aki, a lansa e campaña di "Nominate Your Local Vacation Hero’, unda cu a invita e huespednan di Aruba pa nomina un local cu haci nan encuentro inolvidabel a trabes di bondad, hospitalidad, y a trabes di intercambio di cultura vibrante di e isla. E heroenan excepcional a crea momentonan special cu ta sigui resona cu e huespednan despues cu nan vacacion a termina.

Den un periodo di 2 siman por a conta cu 102 nominacion di diferente huesped. Entre e grupo di huesped aki, a percura pa cumpli cu diferente entrevista pa asina nan por conta nan storia y experiencia a trabes di un video. Na final, e premiacion a keda den nomber di Terrence Huntington - Bartender cu a wordo nomina pa Kristina Vetter pa su servicio excepcional y su spirito amistoso. Sigui pa Erwin Williams - Bellman cu a wordo nomina pa Robert Donkers pa su amabilidad y como un persona servicial, y por ultimo Garvin Ras - Bellman cu a wordo nomina pa Sally Parker pa segura un experiencia inolvidabel. Un premio cu nan no a spera, pero cu sigur a wordo masha aprecia.

Cu e campaña nobo aki, A.T.A. a honra nos hendenan sobresaliente cu ta haci nos isla sinti manera un cas pa tur hende. Nan contribucion ta refleha e esencia di loke ta hasi nos hogar realmente special.