Trahando hunto como ekipo
ORANJESTAD (AAN): Asina yama “War Room” ta un proyecto di strategia di Reino Hulandes a cuminsa oficialmente na Pais ruman Korsou bou di liderazgo di e coordinador di e Plataforma di Coordinacion di Informacion Interinsular (IICP).
Den e proyecto piloto unico aki, tur cinco Cuerpo Policial di Reino Hulandes como tambe RST, KMar y Warda Costa ta uni forsa contra criminalidad transnacional.
E War Room ta funciona como un centro caminda specialistanan di informacion y analistanan ta traha hunto durante dos siman intensivamente. Meta ta pa identifica rednan criminal cu ta opero den Reino Hulandes.
E informacion obteni ta forma e base pa intervencionnan of investigacionnan penal. E War Room ta marca un paso importante pa un colaboracion structural y duradero den e lucha contra criminalidad cu ta minando nos sociedad.
Altocomisario Ramon Arnhem ta indica di tin hopi aprecio pa e organisacion y e participantenan di e War Room. “Ta nos prioridad regional den conhunto cu Colegio di Hefenan di Polis pa intercambia informacion na un manera eficaz den Reino. E War Room ta un resultado bunita di esaki”. tabata palabranan di altocomisario di Polis Arnhem.
