Chens pa negoshinan Arubiano explora mercado internacional ta hopi cerca

Sala yen pa evento informativo cu RVO:

ORANJESTAD (AAN): Den un evento dialuna anochi cu a atrae hopi interes y a conta cu un audiencia completamente yen, Minister Geoffrey Wever a yama bon bini na un representante di Rijksdienst voor Ondernemend Nederland (RVO) pa comparti informacion valioso tocante e apoyo cu e organizacion Hulandes ta ofrece na empresarionan di Reino Hulandes rond di mundo, y cu ta disponibel pa Aruba tambe.

  E evento cu tabata titula "Discover RVO Opportunities for Aruba", a worde organiza pa e Departamento di Asuntonan Economico, Comercio y Industria (DEACI), a traves di su unidad Exprodesk, y den colaboracion cu vertegenwoordiging van Nederland in Oranjestad (VNO).

  E evento a conta cu presencia di Señora Soelan Daal, International Business Advisor di RVO, kende a duna claridad riba e diferente tipo di asistencianan cu RVO por ofrece na empresarionan Arubiano cu ta exporta, of cu tin ambicion pa exporta. RVO ta ofrece, entre otro, subsidionan, voucher pa atende mision comercial, desaroyo di producto, y hasta sosten strategico cu por yuda cu exportacion. Despues di e charla, a tene un recepcion pa ‘networking’ caminda a duna espacio pa conecta y intercambia di idea cu e experto of demas coleganan di Departamento di Asunto Economico.

   "Nos ta kere den e potencial di nos empresarionan. Pero hopi biaha e obstaculonan cu tin ta administrativo; bo no sa unda pa cuminsa. E evento aki ta pa brinda e informacion necesario na esnan cu por haci uzo di esaki, sea awo of den futuro," segun Ministro Geoffrey Wever.

   Ministro Wever a resalta cu Aruba mester sigui busca forma pa amplia su posibilidadnan pa export y innovacion. “Nos ta den un momento clave pa traha relacion strategico cu partnernan for di Hulanda y di region. E instrumento cu RVO tin por ta un herment practico pa yuda nos empresarionan local penetra den mercado internacional.”

   Ministerio di Finanzas, Asuntonan Economico y Sector Primario ta stimula tur empresario pa explora e posibilidadnan disponibel y no laga nan mes limita pa falta di informacion. E presentacion di RVO ta obtenibel via unidad di Exprodesk y pronto lo ta obtenibel online.

   Ministro Geoffrey Wever ta gradici Señora Soelan Daal pa su bishita y presentacion, y Sr. Vincent Storimans di VNO, un partner importante pa gobierno di Aruba. Tambe kier a gradici Señora Maria Dijkhof-Pita, Señora Sharon Meijer y Sr. Giacomo Pais di Departamento di Asunto Economico pa a organiza un evento exitoso.