ORANJESTAD (AAN): - Durante un bishita di trabou na Fair Trade Authority Curaçao, Aruba Fair Trade Authority (AFTA) a tene un dialogo cu Fundashon pa Konsumidó di Kòrsou.
E reunion tabata dirigi pa haya mas informacion tocante e cooperacion entre ente di supervision y organisacion cu ta representa interes di e consumidor.
Segun Fundashon pa Konsumidó, un cooperacion fuerte entre supervision y organisacion di consumidor ta esencial. Supervision ta garantisa cu negoshi ta sigui e regla, mientras cu e organisacionnan di consumidor ta representa e bos di e publico y ta pasa dilanti indicacionnan for di comunidad. Pa comparti conocemento y informacion, ta posibel pa tuma medidanan mas lihe contra abuso y pa duna consumidornan informacion miho tocante nan derecho.
AFTA ta impresiona cu e trabou cu Fundashon pa Konsumidó ta haci na Corsou pa defende interes di consumidor.
Na e momento aki, na Aruba, Parlamento ta bay trata un ley nobo cu lo duna AFTA e responsabilidad di supervision riba derecho di consumidor, cu ta inclui 'enforcement' y educacion pa consumidornan y negoshinan. E speransa ta cu introduccion di e ley aki lo yuda pa aumenta e conciencia riba derecho di consumidor na Aruba y pa pone negoshinan sigui e reglanan cu ta proteha consumidor.
Riba 14 di maart a tuma luga un sesion di informacion titula ‘Comercio husto, compra husto’, den colaboracion cu Universidad di Aruba, cu tabata hopi asisti. Mas informacion tocante e sesion aki y derecho di consumidor ta disponibel na www.afta.aw.
