ORANJESTAD (AAN): Diferente factor a pone cu den fin di siman, varios aerolinea a haya nan obliga na cancela nan vuelo na Merca.
Como 2% di vuelonan di American Airlines a wordo cancela. Como 4% di vuelonan di Spirit Airlines a wordo cancela. Pero esun di mas hopi ta 27% di Southwest Airlines. Riba Diadomingo, un total di 1.006 vuelo di Southwest a wordo cancela.
Uno di nan ta esun di Diadomingo, e vuelo WN1904 di Southwest for di Baltimore pa Aruba, cu mester a yega 12:50 pm, a wordo cancela. Esey a pone cu e vuelo di regreso, esta WN1805 cu mester a sali 1:45 pm tambe a keda cancela.
Riba Diasabra, Southwest pa suerte no tin ningun vuelo pa Aruba.
For di madruga caba e aerolinea a manda texto pa e pasaheronan pa avisa nan cu e vuelo lo wordo cancela. Esey nifica cu varios pasahero a keda pega na Aruba, y lo mester keda un dia mas. Esey ta si acaso e vuelo di Dialuna lo tin capacidad pa transporta esnan cu a keda atras.
Tanto Diasabra como Diadomingo, Southwest tabatin problema cu vuelonan na Merca y a haya nan ta cancela hopi vuelo mes. Riba Diasabra, Southwest a cancela 808 vuelo en total. Net awor cu ta hopi druk, mirando e hecho cu Dialuna ta un dia liber na Merca.
Southwest Airlines a tira culpa riba asuntonan di Control di Trafico Aereo y tambe di maltempo.
E asunto di Control di Trafico Aereo ta relaciona cu loke a socede Diabierna atardi y anochi na Florida, ora cu FAA a impone un programa di maneho di trafico aereo debi na e maltempo, y esaki a causa varios cancelacion.
Cada cancelacion ta pone cu avion ta keda sin bula y yega otro ciudad, y esaki na su turno ta stroba otro vuelo tambe di continua. Personal di cabina tambe asina ta keda ‘pega’ na otro ciudad. Pesey e cantidad di cancelacion ta aumenta di e forma ey debi na logistica.
Esnan cu a keda pega na Aruba riba Diadomingo, a haya nan cu extra gasto envolvi pa cu costo di Hotel, cuminda, etc.
Dialuna 11 di October, e vuelo di Baltimore pa Aruba a sigui normal.
