VRPA cu puntonan importante di recomendacion pa loke ta ‘vacation rentals’

ORANJESTAD (AAN): Diahuebs mainta Vacation Rental Professionals Aruba (VRPA) a tene un conferencia di prensa, unda cu tesorero Alex Cybul a splica cu VRPA ta aplaudi minister Wever, pa e iniciativa cu el a bin cune pa busca un solucion pa e situacion cu tin di casnan pa hende local.

“Nos sa cu tin un problema y door cu ‘vacation rentals’ a wordo anuncia den parti di e estudio,  nos como e profesionalnan di vacation rentals na Aruba ta sinti cu nos mester ta invita pa sinta na mesa”.

Nos pensamento cu e estudio aki ta cu e informacion mester ta concreto.

No solamente mester pensa riba con vacation rentals ta causando e situacion aki, pero kico otro tambe por ta causando e situacion aki, segun Cybul.

El a sigui bisa cu tin hopi otro factor cu ta causa cu tin un scarcedad di cas pa hendenan local.

Cybul a indica cu VRPA ta na disposicion di Gobierno pa yuda busca solucion.

“Nos ta e profesionalnan na Aruba cu tur dia ta atende cu esaki y pesey tambe nos kier trece varios punto di importancia dilanti pa loke ta e vacation rentals”, segun Cybul.

Presidente di VRPA Sjoerd de Vries tambe a hiba palabra y a duna un presentacion.

De Vries a splica cu VRPA ta representa e industria di vacation rentals na Aruba cu ta un grupo hopi grandi y cu tur e miembronan ta cumpli cu tur exigencia di Gobierno.

De Vries den su presentacion a papia di 10 punto di recomendacion pa practicanan sostenible y responsabel, pa loke ta huur di acomodacionnan di vacacion.

El a splica cu VRPA ta representa alrededor di 3.500 vacation rentals, cu ta encera alrededor di 8.800 camber.

“Esaki tin un impacto grandi riba economia di Aruba y pesey ta importante pa tene hopi cuenta cu esaki”, segun de Vries.

 E impacto total cu e cambernan aki tin pa Aruba den diferente area ta 478.7 miyon dollar.

 El a splica cu un persona cu ta keda den un cas di vacacion ta bay diferente caminda y no ta djis keda na un lugar.

E placa cu nan ta gasta ta wordo distribui rond di e isla.

Un di e puntonan di recomendacion cu VRPA tin ta pa introduci un sistema di vacation rentals cu lo provee un structura legal pa regula vacation rentals y pa sigura tambe cu e rentals ta cumpli cu reglanan di seguridad y calidad.

Otro punto ta pa bin cu un aumento den cumplimento di paga impuesto, cu ta sigura cu tin mas igualdad entre e vacation rentals y e hotelnan tradicional.

De Vries a indica tambe cu mester enfoca riba e hecho cu  vacation rentals ta crea hopi oportunidad di trabao pa localnan como tambe bon oportunidadnan pa negoshinan local.

Otro punto di recomendacion ta pa bin cu un bon plan di parkeo, unda cu por ehempel no ta permiti mas cu 1 auto pa cada dos camber disponibel.

Un recomendacion importante ta tambe pa e casnan di vakantie wordo bon manteni, pa loke ta ‘landscaping’, limpieza y seguridad.

Tambe VRPA ta enfatiza cu ta importante pa mas ainda purba atrae mas famia y bishitantenan relativamente hoben (millennials).

De Vries a indica tambe cu e parti positivo di e vacation rentals miembro di VRPA ta cu 50% ta di doñonan local.

“Placa ta wordo gasta na Aruba y ta keda  Aruba”, segun de Vries.