Minister di Turismo a haci un recorido cu prensa pa actualiza informacion tocante proyecto Baby Beach

ORANJESTAD (AAN) — Minister di Turismo y Salud, señor Dangui Oduber, a invita prensa pa haci un recorido y keda actualiza riba e proceso di e proyecto Baby Beach, fase 2.

            Esaki pa prensa wak unda e proyecto ta aworaki, ki dia e lo wordo entrega, y ki expectativa tin pa e temponan nos dilanti. Banda di esaki e dignatario a haci un repaso di locual e proyecto aki ta encera.

            “E proyecto di Baby Beach ta forma parti di e plan integral di e desaroyo di upgrading di e area di Seroe Colorado. Nos a anuncia e proyecto di Baby Beach y Rodgers Beach algun tempo pasa caba. E fase 2 ta encera crea un espacio nobo di parkeo, mas structura y mas organiza. Tambe lo bin un rotonde den e cruzada pa bay Baby Beach of Rodgers Beach, y lo bin iluminacion tambe pa banda di e caya y e beach, ademas lo percura pa tin un landscaping hopi mas bunita y organiza”, minister Oduber a señala.

            Algun tempo atras e mandatario tambe a anuncia e fase 3, cual ta encera construccion di dos kiosco, y drechamento di e canchanan di Tenis cu lo wordo converti den un espacio multifuncional di Beach Tenis, Beach Soccer, Beach Volley, y tambe lo bin un restaurant meymey di e canchanan deportivo aki.

            Tur e diseño pa e fase ey ta cla, y dentro di poco lo cuminza cu un destaho publico tambe, pa asina por cuminza ehecuta e di tres fase di e proyecto aki di Baby Beach, cu sigur ta un mehoracion completo pa e area aki, teniendo cuenta cu e proyecto hotelero di Secrets tambe ta sigui su curso, pa asina prepara henter e area aki pa tin suficiente facilidadnan, un bon infrastructura di calidad pa asina nos ciudadanonan local y nos turistanan por haci uso di e bunita area aki.

            E proyecto aki, Fase 2, a wordo anuncia dia 25 di Augustus, despues e proceso a wordo encamina pa asina DOW organiza un destaho publico, y despues cu esaki a tuma lugar e compania CBC Constructions a gana e destaho, pa asina cuminza na final di aña 2022 cu e fase 2 aki.

            “Si tur cos cana segun e planning y e contratista di CBC, mi a wordo informa, na final di luna di April e fase 2 lo wordo entrega. Directamente, despues di esaki nos lo cuminza cu e fase 3, cu ta consisti di e canchanan deportivo y e restaurant”, Minister Dangui Oduber a reitera.