Director di Aduana Roderick Croes ta anuncia:
ORANJESTAD (AAN)—Director di Aduana, señor Roderick Croes, a duna di conoce, den entrevista cu DIARIO, cu e 'vrijstelling' pa productonan personal cumpra afo, a bira 900 florin, y esaki ta solamente pa biahero.
Croes a splica cu e 'vrijstelling besluit' ta hopi bieu. E ta data di aña 1989, y Aduana tin tur esaki regla den su wetgeving nobo. Pero mirando cu e ta data di un temporada unda e economia tabata completamente distinto y e prijs tabata hopi mas abao, y entre tanto tur prijs di producto a subi na nivel mundial, e ta na su lugar pa ahusta e vrijstelling pa e biaheronan.
Director di Aduana a aclarea cu e ta solamente pa biahero, y mester ta productonan di uso personal, cu nan ta cumpra afo. Pues, e no ta conta pa esnan cu ta bin cu productonan comercial. Esakinan mester busca un broker pa haci aangifte pa nan, y nan mester paga nan invoerrechten, pa nan sali cu nan.
El a subraya cu esaki ta haci mas husto tambe pa e biahero y ta duna nan e posibilidad di introduci mas producto na 'invoerrechtenvrij'.
Tambe el a splica cu un bez cu nan wak cu un producto ta comercial, por ehemplo un biahero ta yega Aruba cu diferente size di zapato, e articulo no ta personal mas, pero cumpra pa diferente hende.
“Aworaki bo ta haya tambe e fenomeno di encomienda. Un hende ta bay afo, ta cumpra diferente articulo pa diferente hende na Aruba, nan ta hendenan cu nos ta saca nan afo y cu tin cu paga invoerrechten. Naturalmente, nos ta pidi nan tambe nan KvK, nan tin cu uza un broker pa haci aangifte pa nan, pa asina evita e concurencia ilegal, cu tin cu e comerciantenan pafo, na Aruba”, Ricky Croes a indica.
E exoneracion ta pa tur producto y naturalmente mester ta riba un factura. E otro productonan “accijns goederen” manera cigaria, alcohol, serves, biña, e vrijstelling a keda mescos. “Solamente pa e productonan cu bo ta cumpra afo pa uso personal, manera paña, zapato, etc., bo por cumpra pa un suma di 900 florin (500 dollar). Si bo tin diferente factura cu hunto ta yega 900 florin, no tin problema cu ne. E ta un proceso normal, cu a wordo haci den pasado caba tempo cu tabata 400 florin, pero naturalmente, ta keda na cada persona cu ta bay biaha pa sali dilanti y duna su ‘fair share’ na gobierno di Aruba. Pues, e ta ley y nos ta spera cu cada hende cu ta bay afo por cumpli cu ne tambe, na momento cu nan yega bek, nan sa cu nan tin 900 florin di vrijstelling y loke ta riba esaki tin cu paga invoerrechten”, director di Aduana, Roderick Croes a reitera.
