Mariniernan di Defensa Region Caribe a train hunto cu militarnan Mericano na North Carolina

ORANJESTAD (AAN): Informacion for di Camp Lejeune na North Carolina na Merca, ta indica cu Mariniernan di Escuadron di Marina Caribense (MSC),

procedente di Aruba, a forma parti di un ehercicio cu a dura tres siman cu e nomber ‘Caribbean Urban Warrior’ (CUW).

   E ehersisio a tuma luga na e base militar di Camp Lejeune, na North Carolina, unda tin e Cuerpo di Marina di Estado Unídos (United States Marine Corps (USMC). Durante e Caribbean Urban Warrior e Mariniernan di Escuadron di Marina Caribense a train pa yega e nivel di escuadron den un zona urbanisa, cu yudansa di exploradornan Mericano, den  bastante lugar di ehercisio realistico. 

   E ehercisio Caribbean Urban Warrior tabata principalmente den e cuadro di Operacionnan Militar riba terenonan Urbanisa (Military Operations in Urban Terrain - (MOUT). Di e forma ey, dunadonan di señal avansa, tiradonan designa, ingenieronan di  infanteria y esnan cu ta salba bida durante combate, a realiza un training cruza den colaboracion cu e mariniernan Mericano di e 2o divishon di Infanteria di Marina.

   Nan a train riba nivel di seccion  den diferente facilidad cu tabata presente na e campamento, manera ciudad di combate, Camp Davis y aldea di training Lejeune, y a eherce varios operacion na nivel di trupa, por ehempel un redada anfibico, un emboscada y un atake riba un pista di aterizahe.  Banda di e Mariniernan di Aruba  un peloton di boto di Curaçao y e destacamento di Marina di St. Maarten tambe a participa na e ehersicionan.  Esnan cu kier mira un resumen di video, bay na website:

www.bit.ly/marinier-usa

   Regularmente durante aña Defensa ta train den Region Caribense hunto cu e Mariniernan Mericano di e 2o Division di Marina.  E ehercicionan ta tuma luga  tanto na Merca como den region Caribe Hulandes. E colaboracion aki no solamente ta demostra e laso estrecho entre ambos pais y nan unidadnan, pero ta brinda tambe e posibilidad pa intercambia conocemento y experiencia.

   Di tal forma Camp Lejeune ta brinda facilidadnan estupendo pa colabora cu e partidonan y e localidad di training aki ta percura cu e Mariniernan di Escuadron Caribe  por train riba un nivel mas halto posibel dentro di nan propio localidad geografico den Region Caribense.