ORANJESTAD (AAN) Arubus tin un proyecto canando caba, y cu ora e keda cla ta bay yuda su usuarionan hopi,
y e ta consisti di un aplicacion (yama “app”), unda e pasaheronan ta yena e aplicacion, y lo ta constantemente al tanto di unda e bus di su ruta ta na e momento determina.
Esaki ta nifica cu e pasahero por controla na ki distancia e bus ta e momento ey, di manera cu no mester sali para den solo warda e bus yega, por ehemplo mey ora prome, pero por yega e bushalte 10 minuut prome, cu mas trankilidad y sin temor di perde e bus y yega laat trabao.
Tambe si surgi un retraso, e usuario lo sa esaki na tempo. E sistema ta den proceso, pero e no ta cla ainda y kizas e lo no falta mucho tampoco pa ta accesible. Esaki banda di e construccion di bushaltenan ‘Abri’ cu tambe lo cuminza e aña aki cu esun prome y lo sigui cu cinco pa aña, lo mehora eficientemente e servicio di Arubus, cu lo bira mas structura. Director di Arubus Eddy Mohamed a emiti e informacion aki den un entrevista reciente cu DIARIO.
No por keda sin menciona cu e compania Arubus a tuma den servicio varios chauffeur pa yena e bashi di falta di trahado cu tin, ya cu diferente chauffeur di edad 60 plus a baha y ta bayendo cu pensioen. Tabata tin momentonan cu e scarcedad di manehador di bus a afecta e servicio pa e clientenan di Arubus. Ta di aplaudi cu Arubus ta buscando diferente manera pa drecha y haci e servicio mas eficiente pa nos hendenan local, pero logicamente tambe pa nos bishitantenan, mirando cu turismo ta creciendo pa nos Isla.
