Director Haime Croes:
ORANJESTAD (AAN)—Den un entrevista cu director di Departamento di Infrastructura y Planificacion (DIP) señor Haime Croes, el a subraya cu nan ta traha a base di e Ley di ROPV, y esey ta guia nan den e desaroyo cu kier bay economicamente.
Hunto cu esey, e ta nifica cu nan ta traha a base di un maneho integral, y riba e ruta cu e maneho ta bisa, tambe segun e prioridadnan di gobierno, y a base di esakinan, DIP ta siguiendo e lista di spera cu tin.
Importante ta pa reitera, señor Croes a bisa, cu nan ta mara na otro departamentonan, na unda nan ta pidi conseho specialmente pa haci e partimento di tereno na un manera eficiente. E no ta manera tempo cu DIP tabata tin tereno pa parti; aworaki nan ta hopi limita y tin cu haci un evaluacion hopi bon di tereno, pa un hende bin na remarca p’e.
E proceso ta bayendo bon, director di DIP a indica. “Nos a automatiza caba e sistema online pa sector comercial, y siguiendo e maneho ey nos ta dunando sea opcion of extension cu tin”, el a señala.
Haime Croes a expresa cu pa DIP tambe, e economia ta un prioridad. Nan kier pa esaki bay bon, y tur cos den cuadro di un desaroyo economico duradero. El a reitera cu nan tin un maneho integral, y a tene cuenta tambe cu industrianan cu nan ta desea, y cu gobierno kier pa e proximo añanan. “Kiermen, teniendo cuenta cu esey, ortogamento ta bay di acuerdo na loke tin. Pero nos no tin cu lubida cu nos tin cu dune bon, kiermen no solamente nos tin cu saca cos pasobra economia mester, pero nos ta sak’e bon pasobra nos tin un tarea tambe di tin bon balance entre tur loke por wordo duna, y tambe un bon control, transparente, pa tur hende cu kier bin wak mañan, con e ta wordo duna, cu nos no ta bay haya nos mes den problema. Gobierno tambe tin un modelo pa loke ta trata dunamento di tereno, y mester bay den su “check & balances” bon. Nos kier pa duna e tereno na un manera husto y transparente”, director di DIP, Haime Croes, a conclui.
