ORANJESTAD (AAN) – Relacionista Publico y Vocero di Departamento di Impuesto (DIMP), Meverly Romano,
a elabora den conferencia di prensa, Diahuebs mainta, tocante Grondbelasting 2021.
Meverly Romano a cuminza pa splica kico ta grondbelasting, pa motibo cu ainda tin hopi hende cu no sa kico esaki ta.
“Grondbelasting ta un tipo di impuesto den nos sistema actual, cu tur persona cu ta doño di un propiedad inmovil tin cu paga, y cu ta encera tambe e personanan cu kizas no ta doño di e propiedad, pero si nan a adkiri cierto derecho riba esaki.
“ Den esaki nos por pensa, por ehemplo, den esnan cu tin un derecho riba erfpacht, cu nan a adkiri di gobierno y nan tambe lo mester paga grondbelasting. Tambe e personanan cu tin un ‘vruchtgebruik’ riba un tereno inmovil tin cu paga grondbelasting” Meverly Romano a splica.
Seguidamente, Romano a menciona cu e grondbelasting ta wordo calcula a base di e valor di e propiedad.
“ Den esaki, nos ta tuma como punto di salida e valor riba mercado. Esaki ta hopi importante pa nos por stipula e valor di e propiedad, pasobra a base di esaki nos tin cu bay calcula kico ta e suma di belasting cu e persona mester paga.
“ Den caso di grondbelasting, un vez cu nos stipula e valor di e propiedad, esaki ta conta pa cinco aña. Kiermen cu nos semper ta mantene un periodo di cinco aña y na e momentonan aki esun cu ta andando ta e periodo 2017-2021. E belasting lo keda igual pa e periodo ey. Cada cinco aña tin e posibilidad di haci un revaloracion y e ora ey nos ta wak kico ta bira e suma nobo di belasting cu e persona tin cu paga”, Meverly Romano a indica.
El a reitera cu durante e periodo di cinco aña e valor di e propiedad no ta cambia, y e impuesto ta mantene e valor ey. Pero si durante e periodo di e cinco añanan bin un cambio drastico den e valor di e propiedad, e ora ey si por resulta cu e suma di belasting ta cambia.
Un cambio drastico den e valor di e propiedad ta sosode ora ta bin un renovacion pareu cu un anexo, of ora ta bin un destruccion, por ehemplo un cas cu a wordo destrui pa un candela, of door di mal tempo. Tambe por pasa cu un propiedad ta cambia di destinacion, por ehemplo si e tabata residencial y a cambia pa comercial. Den e casonan asina, Romano a subraya, por haya un cambio den e valor di e propiedad.
