Aruba awor tin 800 alumno cu ta beneficia di e-Learning

ORANJESTAD (AAN): E siman aki tabata un siman hopi importante pa loke ta trata e proyecto di e-Learning.

Esaki Prome Minister a bisa durante un conferencia di prensa Diahuebs mainta.

El a splica cu Gobierno for di 2018 caba a cuminza prepara pa bin cu e proyecto, ta trece digitalizacion y innovacion mas cerca den enseñanza.

Segun e mandatario e intencion no tabata pa solamente bin cu algun computer, sino pa digitaliza full e sistema di enseñanza.

“Na 2019 nos a apunta e prome scol cu a bira e scol piloto pa e-Learning, esta scol basico Cacique Macuarima”.

Nan a haya e borchinan digital riba cual por duna les, e muchanan por haci les riba nan y nan ta interactive, unda cu por pone entre otro video pa e muchanan mira y experiencia mucho mas kico tin den enseñanza, segun Wever Croes.

El a sigui bisa cu e dos paso tabata un scol preparatorio, esta Cacique Aterima, cu tambe a haya e proyecto aki.

“Ora cu mi a bishita e scol aki y mi a wak kico tur nan ta haci den klas e tabata hopi bunita pa mira, unda cu e mucha y e docentenan tabata hopi entusiasma”, segun e mandatario.

El a splica cu banda di e borchinan digital den cada klas, e docentenan a haya laptops y chrome books pa nan prepara nan mes mihor.

Segun e Prome Mandatario, e di dos fase ta pa bin cu e asina yama goggles di realidad virtual, pa nan ta den e materia cu nan ta studiando.

Asina otro scolnan poco poco a haya e proyecto, di cual e di 4 tabata St. Franciscus College na Playa.

Wever Croes a splica cu contando St. Franciscus College, awor tin 800 alumno na Aruba cu ta participando den e proyecto aki di e-Learning.