VNO a keda impresiona con studiantenan di Colegio Arubano por hiba un debate

Ex-Gobernador Refunjol tambe a hiba palabra

ORANJESTAD (AAN): Siman pasa a tuma lugar e actividad anual di Prinsjesdag cu ta wordo organiza pa Vertegenwoordiging van Nederland in Aruba (VNO) hunto cu Colegio Arubano, destina pa tur 132 alumno cu tin ‘Geschiedenis’ y ‘Staatsinrichting’ den nan pakket den klasnan di HAVO-5 y tambe VWO-6.

   E actividad aki cu ta riba e tercer Diamars di September, ta un chens bunita pa presta atencion na e nificacion di Prinsjesdag na Hulanda y su importancia pa e paisnan dentro di Reino, principalmente pais Aruba.

   El a tuma lugar na Cas di Cultura, y e dia a cuminza cu un presentacion cortico di VNO riba e nificacion di Prinsjesdag y e discurso di trono.  Tambe a papia di e presentacion di presupuesto na Parlamento Hulandes y e debatenan riba esaki, e asina yama reflexionnan general politico y financiero.

   Ademas e mainta aki tabatin un invitado special, esta ex-Gobernador Fredis Refunjol, kende a splica na un forma interesante con e proceso di presupuesto di Aruba ta funciona, y e rol di Parlamento den esaki.

   E presentacionnan a bay combina cu sesionnan hopi anima di debate riba temanan actual constitucional, den cual varios grupo di alumno mester a defende diferente punto di bista y por a gana mitar punto di estudio pa e vak di geschiedenis y staatsinrichting.

  Hurado a keda impresiona con bon a debati den idioma Hulandes, con convincente tur argumento tabata, y con nechi e discusionnan a desaroya.

   Na final, VNO a ofrece tur studiante un sandwich y algo di bebe.

   E studiantenan a adkiri un experiencia grandi cu e Debate di Prinsjesdag, cu sigur lo bay yuda nan den futuro estudionan, sea na Aruba of den region, of Hulanda, Merca of Canada.