Lo duna informacion valioso riba salud y movecion
ORANJESTAD(AAN): Manera ta conoci, dia 13 di October Departamento di Salud Publico hunto cu Plataforma Promocion di Salud ta organiza un Expo Salud pa promove salud y bienestar, cu ta bay tuma lugar na Renaissance Convention Center
Diferente organizacion, departamento y instancia ta bay ta presente, incluyendo IBiSA.
Durante un conferencia di prensa Rodymar Geerman, hefe di departamento di desaroyo di deporte di IBiSA a hiba palabra y el a splica cu den e Expo IBiSA lo enfoca riba e parti di salud y movecion.
“Pa e parti di salud nos ta bay tin nos propio booth pa brinda informacion riba nos actividadnan fisico y con pa mantene bo mes na un peso saludable”.
Tambe nan lo duna informacion riba con pa drumi, con pa bebe y con pa come, segun Geerman, kende a sigui bisa cu lo duna tur informacion pa bo por biba mas saludable posibel.
El a indica cu tur hende por pasa controla tambe nan peso, haltura y cintura, mientras cu ta check bo asina yama BMI, cu ta bo ‘Body Mass Index’.
A base di bo BMI, bo lo haya e conseho si bo ta obeso of no y kico bo por haci pa bo por ta mas saludable posibel.
“Nos ta bay tin tambe nos parti di movecion, unda cu ta bay tin un area completo destina pa esaki”.
Ta bay tin un ganzenbord marca y esnan cu participa ta bay tira dou, unda cu ora cu nan cana nan ta haya diferente actividad fisico pa haci.
Esey ta pa stimula bo pa haci mas movecion posibel y contribui na bo salud, segun Geerman kende a indica cu ta bay tin premionan tambe.
