Condicionnan di bida ta wordo afecta den barionan di Aruba - *Mester adapta leynan cu ta proteha e ambiente diario di e Arubiano - *Balor di casnan ta bay perdi y hotelnan clandestino a bira negoshi
ORANJESTAD (AAN): Kico ta un cas? Kico ta un vivienda? Kico ta un bario?
Preguntanan cu ta bira un cadena pa cantidad di Arubiano cu ta bira victima di desaroyonan cu ta wordo registra.
Na 2020, ora e Coronavirus nobo a bati na porta di Aruba, vivienda di e Arubiano a bira central.
“Shelter in place” a haci cu casnan familiar a wordo considera como e lugar cu por a duna proteccion na hende contra enfermedad mortal.
Ta den e epoca aki tambe, e calidad di bida y problemanan cu ta sconde tras di murayanan di cas, a bini dilanti.
E problemanan scondi a uni na problemanan visibel na hopi parti di bida na Aruba, caminda ciudadanonan mester di leynan cu ta evita cu situacion di vivienda ta sali for di man.
Manera diferente reclamo a mustra, a bira tempo pa bini cu leynan cu ta proteha e ambiente diario den cual e Arubiano mester biba segun custumbernan y nivel di bida di e Arubiano.
Mas y mas DIARIO ta wordo confronta cu informacion cu ta indica, con excesonan riba tereno di vivienda ta tuma lugar.
Situacionnan cu ta baha balor di viviendanan den vecindario directo di un cas, ta wordo registra. Balornan di cas ta bay perdi mientras cu cantidad di cas ta bira negoshi peligroso.
Ora analisa loke Arubianonan ta trece dilanti, sigur ta haya tur indicacion, cu tin trabou pa Parlamento pa revisa leynan cu tin actualmente y cu ta atende cu exigencianan na Aruba.
Riba Dia di Turismo por ehempel, aspectonan special riba e tereno aki a bini dilanti.
Viviendanan ta bira hotel cu den cierto casonan ta cambia bida di un bario ya cu e huespednan, ta duna motibo di preocupacion.
Negoshi sin limite ta wordo haci cu vivienda, cu ta baha calidad di barionan cu ta bira centronan pa cierto gruponan.
E cara di miseria ta keda presenta den barionan di Aruba, cu ta perde nan balor pasobra nan ta barata, segun normanan cu no ta mara directamente na falta di placa, pero na normanan cu ta contra principionan di bida domestico na Aruba.
E calidad di bida di e Arubiano di e forma aki ta wordo directamente afecta den barionan caminda e Arubiano no ta sinti su mes na cas den condicionnan di bida, cu no por ta permiti pa ley.
Leynan nobo mester wordo skirbi pa vivienda na Aruba, caminda Gobierno a inverti den casnan pa Pueblo cu ta tuma nota di construccion di tur tipo di “vivienda” rond Aruba, loke pa hopi Arubiano ta duna splicacion con ilegalidad por sconde na e pais, cu mester cuminsa controla e centro di bida di hende, cu ta vivienda di habitantenan di e pais.
