Comerciantenan cu ta bendiendo esaki tin di entrega nan bek- ORANJESTAD (AAN): Den e ultimo temponan Departamento di Aduana a tuma nota
di un producto cu varios tienda y supermercado local ta bende clasifica como cigaria pero sin sello conforme ley. Ta trata aki di e producto “Racer Cigars” di diferente sabor manera cherry, menthol, peach, strawberry, smooth y full flavor.
Pa importa cigaria, Departamento di Aduana ta informa cu un persona mester tin un permiso di Aduana como importador di cigaria y mester paga accijns riba e producto aki. Ademas e producto mester tin su sello corespondiente riba e paki manera prescribi den ley como prueba di importacion legitimo di cigaria.
Departamento di Aduana ta pidi tur tienda y supermercado local cu tin e “Racer Cigars” actualmente na benta sin permiso legal di importacion pa porfabor entrega e productonan aki inmediatamente.
Den e caso aki lo haci un excepcion y lo duna oportunidad pa trece e productonan voluntariamente na Aduana entrante Dialuna 27 di September te cu dia 30 di October 2021. Esaki ta pa coordina cu Aduana pa manda e productonan den exterior of pa destrui nan.
Tuma bon nota cu despues di e fecha di entrega menciona, Aduana lo bay ehecuta su control. Si acaso encontra e producto en cuestion, e bendedor lo ricibi un multa.
Departamento di Aduana ta spera di por a informa tur cliente y pueblo di Aruba debidamente.
