Di regreso na normal forzoso un palabra ta central den maneho mundial - *Ainda mundo no ta sigur kico e prijs real di Covid-19 lo ta na 2022 - *Prijs di articulonan basico di bida, awa, coriente, vivienda ta determinante
ORANJESTAD (AAN): Mundo a drenta un etapa nobo. E epoca inmediatamente despues di un paralisis internacional pa motibo di Coronavirus nobo, ta marca pa incertidumbre tocante e forma cu hende lo ta capaz pa paga pa costo di bida despues di 2021.
Te awor espectativanan cu tabata alcansa publico, tabata alentador. Si esaki tabata basa riba sentido di realidad, ta awe na discusion.
Varios pais grandi, manera Inglatera, a pone na duda si riba termino corto y na 2022, inflacion cu ta enemigo di hende pa loke ta trata costo di bida, por wordo domina.
Covid-19 a duna ocasion na e mihor produccion di inflacion ora produccion mundial a cay y prijsnan, afecta pa factornan basico, a bay halto.
Costo di bida a subi manera hende ta nota ora e haci compra. Si e lo sigui subi, ta un pregunta cu te cu ayera ora DIARIO tabata prepara e edicion di awe, no por a wordo contesta.
Aumento mundial di costo di bida of e impotencia pa baha e cantidad di placa cu hende mester pa su bida diario, tin efecto directo riba economia mundial cu ta drenta un circulo virtual.
Economia ta crece y ta brinda espacio pa recuperacion financiero y social, na momento cu hende tin suficiente placa pa gasta y na momento cu prijsnan ta permiti hende cumpra loke nan cartera ta permiti.
Produccion mundial di productonan a cay na 2021 y a afecta prijsnan, cu tambe a wordo influencia dor di tur otro factor cu ta haci bida mas caro.
Importante den e costo basico di bida ta e necesidadnan basico di hende. Prijs di awa y coriente ta hunga un papel sumamente importante, mescos cu prijs di gasolin, prijs di vivienda.
Costo di bida ta permiti hende of ta stroba hende gasta placa, loke ta afecta tanto economia local como economia mundial, ya cu comercio internacional ta un cadena.
Ora hende no por gasta placa, e no por biaha. Esaki ta afecta turismo, loke na su turno ta afecta paisnan manera Aruba cu ta depende di turismo, pero companianan di aviacion entre otro.
E impacto cu costo di bida tin y e forma con inflacion por tranca desaroyo mundial, tabata sigur na discusion ayera.
Inflacion ta nifica cu placa ta perde su balor. Kico e lo nifica pa gobiernonan, organisacionnan cu ayera no por a duna ningun garantia riba e realidad di inflacion na 2022, sigur tabata notabel.
“Mundo no a bandona tereno di problema ainda,” tabata e mensahe cu DIARIO a ricibi di expertonan cu ta asisti DIARIO den investigacionnan importante pa por informa Aruba den e temporada di recuperacion mundial di e crisis internacional di Covid-19.
Pa loke ta trata Aruba, informantenan a indica cu di Gobierno logra den su intentonan pa introduci e proyecto di Eagle LNG cu por baha prijs di awa y coriente, ya a logra un paso importante pa Aruba den su posicion competitivo pa atrae turista pero tambe sigur empresanan cu mester vigila nan gastonan den e temponan venidero.
Kico inflacion lo haci directamente cu estado y cu hende, ayera a bini dilanti riba e plataforma internacional caminda gruponan di interes a cuminsa expresa nan mes.
E impacto di inflacion riba personanan cu ta depende di entrada di pensioen cu no por subi sin mas, a bini dilanti.
E impacto di inflacion riba empresanan chikito cu mester bolbe amplia nan actividad.
Mundo ta habri caminda pa un normal nobo, cu ainda ta spera contesta pa basta pregunta basico.
E cantidad di placa cu hende tin pa gasta, e forma cu hende por cumpli cu e demanda di costo di bida mientras 2021 ta yega na su fin, lo ta fundamental pa pronostica e desaroyonan di futuro directo di un mundo cu ta lucha pa alcansa su recuperacion.
