Señora Rish-Ann Ammerlaan di FCVR:
*Hopi caso no ta yega cerca e fundacion pa busca sosten
ORANJESTAD (AAN): Den un entrevista recien cu DIARIO, señora Rish-Ann Ammerlaan, trahador social di Fundacion Contra Violencia Relacional (FCVR), a bisa cu apesar cu e fundacion ta ripara via medionan social cu tin diferente caso di violencia relacional, e casonan mes no ta yega directamente na e fundacion. Esaki ta un empuhe pa FCVR bira cada biaha mas visibel den nos comunidad, pa sigui informa y orienta hende. Segun e trahador social, ta importante pa comunidad, specialmente esnan cu ta victima di abuso relacional, sa cu FCVR ta presente pa brinda apoyo y ayudo.
Sinembargo, señora Ammerlaan a enfatisa cu FCVR no por informa oficialmente di casonan cu no ta yega na nan, pero via medionan social ta nota cu tin hopi situacion di violencia entre parehanan na Aruba.
Segun señora Ammerlaan, FCVR tin bon relacion cu diferente instancia, entre otro cuerpo policial, cu hopi biaha, ora un situacion di violencia tuma luga, ta informa e victima tocante e existencia di e fundacion y e posibilidad pa busca ayudo libremente. Entre e tipo di apoyo cu FCVR ta brinda, tin trainingnan, charlanan, bishitanan na companianan y instancianan.
Señora Ammerlaan a añadi cu violencia relacional ainda ta un topico taboo. Hopi persona ta haña difícil pa acepta cu nan ta den e situacion ey, y no ta busca ayudo. Esaki, segun e trahador social, tin di haber cu diferente factor personal y social, cu ta causa cu, lamentablemente, hopi victima di violencia relacional ainda no ta yega directamente na FCVR pa busca sosten.
