Señora Romely Flanegin papiando di social media:
ORANJESTAD (AAN); Den entrevista recien cu DIARIO, Directora di Tienda di Educacion, señora Romely Flanegin a remarca cu como mayor, mester regula y structura e uzo di orario di pantaya, sea di telefoon, tablet of television, di nan yiunan. Segun, señora Flanegin, no por duna muchanan un telefoon y laga nan haci y deshaci. Mayornan ta keda responsabel di loke muchanan ta wak y con largo nan ta uza e aparatonan aki. Sinembargo, señora Flanegin a enfatisa, mayornan mester ta un ehempel tambe pa nan yiunan y pasa mas tempo cu nan yiunan.
Señora Flanegin a remarca cu e falta di combersacionnan y falta di pasa tempo di calidad entre mayornan y yiunan, ta causa problema den e parti social emocional y e salud mental di famianan den nos comunidad. E hecho cu mayornan hopi biaha no ta na cas pa controla cuanto tempo nan yiunan ta pasa riba un pantaya despues di orarionan di scol, ta contribui tambe na e problema aki.
Tienda di Educacion, señora Flanegin a indica, cu hunto cu Comision Vision Pedagogico Aruba, ta hibando campañanan riba medionan social pa conscientisa mayornan di e uzo di medionan social y cantidad di ora di uzo di pantaya cu ta permiti muchanan. Un problema cu esakinan ta causa, ta e hecho cu muchanan no por concentra bon of participa den klas pa falta cu no por uza apartatonan di pantaya. Muchanan ta link tur cos na apartonan electronico y hopi biaha ta bira dependiente di esakinan.
E plan pa 2026 di Tienda di Educacion ta pa sigui conscientisa mayornan, bishita scolnan ora di oudersavond, charlanan den barionan, entre otro, pa trata e topiconan aki. E meta principal ta pa conscientisa mayornan cu apesar cu situacion financiero no ta mucho bon pa hopi famia, actividadnan social y combersacionnan cu nan yiunan ta hopi importante.” Tin hopi cos cu ta costa poco placa of cu no ta costa nada cu por haci como famia pa tin conexion social den famia”, señora Flanegin a expresa.
