ORANJESTAD (AAN) – Solangel Dinmohamed-Lacle, den su amplio relato tocante su experiencia desagrable como candidato di Partido MAS, a trece dilanti den conferencia di prensa cu dia 7 di Juli señora Gunn a saca un video difamando su persona.
El a bisa cu e video aki, segun e manera di traha di Partido MAS, mester a haya aprobacion di e bestuur di Partido MAS.
“Pues durante henter e campaña ningun hende mag di bay un entrevista, ni tuma contacto cu prensa, ni contesta yamada di prensa, ni post un video of potret pero tur mester a haya aprobacion di partido MAS” Solangel a expresa.
Es decir, cu e video aki tambe mester a conta cu aprobacion di Partido MAS, y el a wordo uza door die partido pa no cumpli cu e protocol, e dama a agrega, señalando aki cu e video aki a bolter.
“E video aki ta e causa cu awe Partido MAS no ta forma parti di Gobierno. Y no door di Solangel. Partido MAS no ta forma parti di gobierno pasobra cu e video aki, señora Aquanette Gunn a sa di demostra ki tipo di persona e ta, y a sa di demostra e falta di liderazgo den Partido MAS”, Solangel a señala.
Den e video, Gunn a atacha Solangel di tin un comportacion insano durante e campaña, sinembargo Solangel ta corda cu el a bisa den un video dia 12 di Juni, y a post riba su facebook page cu MAS ta traha a base di confianza, cu nan ta un team solido y cu nan tur ta aporta y semper nan ta yega na consenso.”Señora Gunn a haci referencia na mi persona bisando cu mi a uza e protocol como un tool di campaña. Pero manera mi a mustra anteriormente, dia 5 di Juni señora Gun a papia di e protocol aki y a menciona cu Partido MAS ta un trendsetter pasobra nos ta bay bin cu e protocol aki, y cu ta inhusto y un falta di respet pa cualkier persona cu tin menos voto, drenta Parlamento”, Solangel a remarca.
Tocante e forma con el a hiba campaña Solange a splica cu ta berdad cu el a haci un campaña bayendo cas pa cas, di hende pa hende y di consenshi pa consenshi.
E ta kere cu no tin duda con duro el a traha durante e campaña politico, durante seis siman.
Banda di a sigui cu trabao normal, y cu e ta un mama, un casa y tambe un yiu el a entrega tur cos na e campaña aki, Solangel a relata.
“Y lo ta un tiki straño cu mi ta yega cas y campaña pa un candidato cu no ta haciendo locual mi ta haciendo”, el a agrega.
Solangel a menciona algun aspecto mas cu a sosode unda e bestuur mes ta gaba su trabao como esun cu a traha mas duro durante e campaña, y cu ta contradeci e ponencianan di Gunn.
