ORANJESTAD (AAN): Durante un conferencia di prensa Diahuebs, Prome Minister Evelyn Wever Croes a duna comentario riba e sugerencia treci dilanti
recientemente durante su reunionnan cu stakeholders como Formador, pa den tur sector empleadonan traha 40 ora pa siman y no mas por ehempel 48 ora pa siman.
Esaki tambe mirando cu den pasado e mesun tema aki a bin dilanti caba.
“Personalmente mi ta comparti e pensamento aki, pasobra pa e personanan cu ta traha 48 ora pa siman esaki ta un desgaste”.
"Tur hende tin mester di un descanso na cierto momento y e efecto mas grandi ta riba e famia", segun Wever Croes, kende a enfatiza cu e ta comparti e deseo aki y cu e punto aki sigur ta riba e lista pa bay haci un dialogo riba dje.
El a splica cu mirando e efectonan financiero/economico cu esaki por tin riba e doñonan di trabao, mester evalua kico ta e mihor manera pa esaki worde implementa, sin haci e cambionan di un dia pa otro.
“Mi tin cu traha un verslag di tur e reunionnan cu mi tabata tin y e punto aki sigur ta bin den e verslag”, segun Wever Croes.
