Recuperacion actual Aruba ta exigi castigo pa trampa politico peligroso
*Florin Arubano a wordo pone na peligro cu kiebra di su solidez financiero
*Mester introduci castigo pa mal maneho di placa pa evita futuro repiticion
ORANJESTAD (AAN) -- Awe Aruba ta paga un suma halto na belasting, a base di e maneho directo di Mike Eman como Ministro Presidente di Aruba, cu a crea un debe enorme pa Aruba paga cu proyectonan mal prepara y un maneho descabeya pero na mes momento a deshaci di entrada di Aruba pa e por a gana eleccion na 2009.
Pero tin un aspecto mucho mas importante, cu ta e hecho cu Florin di Aruba a wordo directamente poni na peligro, ya cu debe nacional ta e factor cu ta baha e balor di un moneda di un pais, manera na Venezuela a wordo demostra.
Por hasta conclui, cu Florin di Aruba por a perde su balor si no tabata pa e hecho cu Aruba ta parti di Reino Hulandes cu pa medio di Statuut tin un deber cu Aruba pero tambe responsabilidad.
Kico a pasa realmente cu Aruba na 2009?
Mundo a confronta un crisis financiero na 2008. Recesion, e palabra mas dificil cu ta wordo uza pa e situacion di caida financiero di mundo na 2008, a haci cu Aruba tambe mester a introduci medida.
Aruba ya tabata tin debe financiero mara na entre otro debenan di e pais, cu Hulanda na inicio di Status Aparte no a schrap pa Aruba manera a pasa cu e debe nacional di otro paisnan den Reino, pues Curacao y Sint Maarten cu na 2010 a haya nan Status Aparte.
Mester bisa cu 2010, a topa Reino Hulandes den circumstancianan bastante turbulento cu surgimento di un lider nobo, Mark Rutte, pero tambe final di Antia Hulandes, cu a wordo sigui pa necesidad di atencion grandi di Reino, sigur si tene na cuenta cu e prome Gobierno di Curacao como pais autonomo, Gobierno Schotte, a cay den deshonor total.
Den e situacion nobo di Reino y despues di un crisis mundial financiero pues recesion, Aruba mester a atende cu su situacion financiero y a introduci BBO cu a nifica un aumento di e peso di belasting den e forma cu a baha e peso di belasting directo ora a introduci e BBO como belasting indirecto.
Pues pa por a deshaci di BBO, mester a bolbe na e sistema bieu cu tabata garantisa e entrada na otro belastingnan cu a baha ora BBO a wordo introduci.
Mike Eman a uza e rechazo di BBO, of mihor bisa e sistema acumulativo di BBO, como su cabay politico pa priminti pueblo loke e mes despues mester a anuncia cu no ta posibel y e mitar BBO cu el a kita na November 2009, despues di tempo a conduci na un aumento di BBO bou su propio gobernacion.
Gobierno Wever-Croes, pa scapa Aruba for di e desastre financiero cu el a laga atras, mester a bolbe aumenta BBO.
Awor kico ta central den loke a pasa ayera? Cu deliberadamente, Mike Eman a debilita e situacion financiero di Aruba dor di baha BBO pa e gana eleccion pero na mes momento, aumenta e debenan di Aruba na un forma cu generacionnan cu te awe ainda mester nace, ta paga un suma di belasting astronomico.
Pero tin un punto cardinal cu no ta haya atencion. Pa Mike a hiba e maneho cu el a hiba, el a kibra e Ley principal cu ta dicidi con un Gobierno por gasta placa di Pueblo.
E Ley di Contabilidad ta bay contra e forma cu Mike a baha BBO sin reemplaza e entrada cu Aruba no a ricibi mas.
E Ley di Contabilidad ta contra e forma cu Mike a crea debe pa Pueblo paga awe y pa generacionnan cu ta bini.
E proyectonan Bo Aruba, cu no por wordo controla ni dor di Hulanda ni Parlamento, awe mester wordo paga dor di Pueblo.
Gobierno Mike Eman a viola e Ley di Contabilidad, manera ta bini dilanti pues directamente den e Rapport Bo Aruba, cu ta un scandal di abuso di 1.6 Biyon di placa di Pueblo.
Si awe Aruba no mester a paga e debenan cu Mike Eman a laga atras, e placa cu ta drenta caha di Gobierno, no mester wordo uza pa paga debe di Mike pero lo por a bay directamente pa Pueblo di Aruba segun e proposito directo di Ley di Contabilidad.
Ora un persona den empleo di un compania, perhuduca e compania intencionalmente, e compania por entrega un caso na Huez.
Ora ta trata placa di Pueblo, ciudadanonan por bay Huez pa reclama loke ta pasa, pero den practica e no ta socede.
Pues cambio di e Ley di Contabilidad en todo caso adaptacion na e sistema legal di Aruba na abuso di placa di Pueblo, mester bira realidad sigur despues di logronan grandi di Pueblo di Aruba, cu a base di e maneho di austeridad y realistico di Gobierno Wever-Croes awe ta goza di retorno di parti di nan derecho pa goza di e recuperacion financiero di Aruba, cu no por wordo manipula den mundo politico.
Esaki ta e base di e advertencia di Reino, pa continuidad politico na Aruba, cu mester evita ripiticion di e maneho financiero di abuso di Gobiernonan Mike Eman.
