Tisa LaSorte, CEO DI AHATA:
ORANJESTAD (AAN)—Otro tema na cual Tisa LaSorte, CEO di Aruba Hotel & Industry Association (AHATA), a haci referencia na dje ta esun di autonan ATV y UTV, hopi uza pa turistanan cu ta bin Aruba.
LaSorte a declara cu e problema aki no a wordo full soluciona ainda, y nan ta wardando riba un policy nobo cu ta biniendo, segun AHATA tin entendi.
Esaki ta e di cinco aña caba cu AHATA ta boga pa regulacion, y e tin entendi cu tin combersacionnan ta tumando lugar, y tin un policy nobo cu lo sali pronto y cu AHATA ta pendiente di esey.
“Pero e tin di haber tambe si tin demasiado hende na cierto lugar, pues e ta experiencia tambe di e hende local y e turista si no tin cierto control di cuanto hende tin, of si tin demasiado vehiculo y tur tipo di vehiculo, of riba caya of den naturaleza, y tambe con nos ta trata naturaleza”, LaSorte a comenta.
El a agrega cu e ta tambe hopi tipo di educacion, reglanan, pa hende compronde cu mester respeta naturaleza.
Segun CEO di AHATA, ATA ta bezig trahando un bon plan no solamente di saca un bon mensahe di kico por y kico no por pa esnan cu ta na Aruba, pero tambe tin di haber cu strategia di ATA pa atrae e tipo di turista cu tin respet pa naturaleza. Pues, tambe ta na ken ta wordo invita pa bin Aruba.
Tisa LaSorte a relata cu e Conferencia ta mas pa e relacion entre Aruba y e partnernan na Merca, Europa, y Latinoamerica. “E ta eigenlijk un relacion cu ta sigui tur aña y tur dia. Pero e ta djis un momento pa nos por mira otro en persona, papia di cierto temanan y pa nan wak con Aruba ta progresa”, CEO di AHATA a relata.
El a conclui bisando cu AHATA y tur compania tin bista riba 2030 cu nan por yega na un Aruba, unda cu tin un bon armonia, entre e industria di turismo y calidad.
